بقلم الخالة وداد
الموضوع ده ياولادي مهم وجميل .واحد هيسأل هو في افكار بتتباع ياخالة!
أومال….طبعا….كل حاجة قابلة للعرض تبقي منتج سواء كان منتج مادي أو معنوي ولأن الأفكار هي الي بتخلق الثروة ولان الأفكار عائدها بيبقي مادي ومعنوي ففي طرق لعرض افكارك علي من يهمه الأمر.
فلازم تعمل كام حاجة وتاخد بالك منهم:
اولكش لازم تحدد فئة الجمهور الي بتبعله المنتج وتكون محدد هدفك كده من أولها غرضك ايه من البيع
تاني حاجة تحط نفسك مكان العميل وشوف ايه هتستفيده من المنتج وهتشعر بايه وهل حقق ليك رضا وافاده ولا زيه زي الي قبله
تالت حاجة لازم تتخيل الحدث بينك وبين العميل قبل ما تقابله يعني تصور مسبق للحوار والمقابلة
رابع حاجه لازم تعيش مشاعر التقدير الذاتي والرضا عن المقابلة يعني تتخيل انك خرجت من عند العميل وانت منجز الهدف ومبسوط
خامس حاجه لازم تكافئ نفسك بقي لانك انجزت خطوة مهمة أووووي
سادس حاجة لو محصلش وانجزت يبقي تنقد تصرفك وتفكيرك مش تنقد نفسك لا تمدح نفسك وتنقد تصرفك
سابع حاجة لازم تكون كاتب الهدف ده قدامك بصيغة المضارع وتقرأه مره واتنيم وعشره وتعدل وتظبط لحد ما يبقي حقيقة قدامك
تامن حاجة خد بالك انت بتكلم نفسك ازاي ومشاعرك عامله ازاي
تاسع حاجه لازم تحترم العميل وتبقي علي تواصل معاه وتلتزم بالشرف والمصداقية وتعامله كبشر مش كمشتري
عاشر حاجه لازم تحافظ علي عملائك القدامي وفي كل مناسبة تتواصل معاهم وشوف رايهم في المنتج الي بيعته ليهم
