حياة الفنانينعام 
“ميرنا وليد ” جمهوري ومحبة الناس الداعم الكبير لي فنيا وبناتي هم روحي وسبب وجودي في الحياة
من حسن حظي كانت بدايتي مع نجوم السينمال سعاد حسني و أحمد زكي
يهمني في اختيار الدور العمل نفسه وليس الدور
اعتذر إذا فيه مواقف محرجة متل القبلات لأني بطبيعتي أنا خجولة
فضلت الحياة الأسرية لأني محتاجاها
العمل إلي أعادني للدراما هو سيعرض قريباً “قيد عائلي
الداعم في حياتي الشخصية هو زوجي
اللون الأزرق أجمل لون في حياتي أنا بعشقه
فنانة متألقة ورقيقة بدأت التمثيل في سن صغيرة،مع نجوم السينما،غابت عن الحياة الفنية لانشغالها بحياتها الخاصة ورعاية ابنتيها التي هما سر سعادتها لتعود من جديد للحياة الفنية في المسلسل القادم “قيد عائلي “مع النجمة المتألقة ميرنا وليد وكان لنا هذا الحوار الخاص لسحر الحياة
حوار ريما السعد
الفنانة ميرنا وليد كانت البداية مع النجمة الراحلة سعاد حسني والنجم الراحل أحمد زكي حديثنا عن البداية والانطلاقة وماذا توقع لكِ الراحل أحمد زكي ؟
من حسن حظي الحمدلله أنو بدايتي كانت مع نجوم متل “سعاد حسني “و”أحمدزكي”و”يسرا”حاجة كانت تفوق حتى أحلامي لم أحلم أن تكون بدايتي مع هؤلاء النجوم ،وفي دور كبير الحمدلله هذا توفيق من عند رب العالمين،
أحمدزكي هوأول حد عمل معايا تيست التمثيل علشان كدا الأستاذ علي بدرخان قال له هي ديه البنت الي حتعمل الدور فشوف حتنفع ولا لأ قعد معاياوقرينا المشاهد سوى والحقيقة قلي هذه السنة أخذت جائزة أوسكار بنت عمرها “١٥”سنة وهو أصلاً ميعرفش سني وأنا كان عمري وقتها “١٥”سنة وبدأ يشجعني ويقول لي هيا مش أحلى منك وتقدري تكوني زيها ويقول كلام يخلي روح المنافسة تشتعل جواكي،وأنتي تقدري تاخذي الأوسكار وأنا وقتها ماكنت أعرف الأوسكار ولا غيرها،وفعلاً لما عملنا فيلم “الراعي والنساء” سبحان الله أخذت جائزة الأوسكار للسينما المصرية وطبعاً أخذت أكتر من جائزة على الفيلم ،لكن لما أخذت جائزة الأوسكار تحديدا دورت بعينيا على أحمد زكي وقلت له أهو زي ما قلتلي أنك تقدري تعملي كدا وفعلاً عملتها
كيف تختار ميرنا أدوارها وما هي النقاط الأساسية في اختيار الدور ؟
أهم حاجة بركز فيها العمل نفسه مش دوري ،يهمني العمل ككل مش أعمل دور بطولة لوحدي والعمل يبقى أي كلام
أحب العمل أولاً تكون قصته حلوة وقوي ومخرجه مهم ما ياخذ العمل ويوقع ،أبطاله حلوين ودوري يكون كويس مش لازم أكون متفردة بالبطولة خالص، لما بقرأ العمل على الورق أقراه بعين المتفرج ولو اهتميت بالعمل وحسيت إني حتابعه أخذ الدور أيا كان دوري لا يهمني حجم الدور أهمية الدور تهمني أكثر وممكن اعتذر عن دور كبير وأخذ دور صغير وأنا إلي أطلبه بس أحس أن الدور هذا أحلى كدور مش عدد مشاهد وخلاص
رشحتي لدور البطولة في أحد الأفلام الكبيرة وقدمتي اعتراضك على الدور ورفضتي تقديمه ما هو السبب في ذلك !
ممكن أرفض عمل لو حسيت العمل نفسه مش مناسب ،أعتذر عن عمل لو أنا حعمل فيه مشاهد مثلاً قبلات أنا بطبيعتي بني أدمة خجولة لا أقدم هذه المشاهد،بعتذر عن الدور عادي جداً
ميرنا وليد نجمة شهيرة منذ الصغر لماذا قررتي الابتعاد عن الأضواء وفضلتي الحياة الأسرية ؟
فضلت الحياة الأسرية لأني محتاجاها،من و أنا عندي ١٥سنة وأنا في المهرجانات وكنت باخذ جوايز وأتعاملت كنجمة والناس كلها بتكتب الصاروخ الفني كل دا عشته،مع الوقت بقيت حاسة مش هي ديه الحياة مش هي ديه السعادة ،الحمدلله نجحت فيه وعندي جزء من حياتي ناقص جوايا كنت محتاجة أكمله يكون عندي أطفال وأعيش الأمومة وأحسها فقررت أني أحقق هذا الجزء من أحلامي وأبعد وأتفرغ ويكون عندي أطفال وأراعيهم والأطفال في سن صغير وسن معين محتاجون رعاية جامدة جداً
فكنت محتاجة أتفرغ لهم عشان ضميري يكون مرتاح ،مكنتش أحب أحس أننا مقصرة بحق أطفالي على حساب شغلي عطيت وقت لحياتي الشخصية
بعد غيابكِ عن الفن ما الذي أعادكِ إلى الدراما !
أديت بناتي الوقت إلي هما محتاجين أكون معاهم و أرعاهم بشكل جيد لحد ما يقدروا يكلموني لوحصل معاهم حاجة،
والعمل إلي أعادني للدراما عمل حلو كبير وقيم,ومن الحاجات إلي أنا بحبها وخاصةً أننا حشتغل مع الفنانة ميرفت أمين وهذا كان حلم من أحلامي سبحان الله اشتغل مع ميرفت أمين،أتعرض عليا العمل وأنا فيه بنت ميرفت أمين فهو عمل قوي جداً وهو “قيد عائلي” وإن شاءالله حينعرض الشهر هذا مع مجموعة كبيرة من الفنانين
دراستك فن الإخراج ماهو الهدف منه ؟
دراسة الإخراج الحقيقة كنت محتاجة لدراستها حتى أفهم في التمثيل أكثرأكثر من أننا أكون مخرجة،لكن درست الإخراج حتى يفيدني في التمثيل وأنا داخلة التصوير أكون فاهمة كل حاجة بتحصل حوليا في اللوكيشين،يعني أفهم أيه الإضاءة ،عدسات،كاميرات،يعني بتدعمني في شغلي،ولو يوم فكرت أعتزل التمثيل،أشتغل حاجة في نفس المجال بتاعي لأني فعلا بحبها
من خلال مسيرتك الفنية ماهو أقرب دور لقلب ميرنا وليد !
من الصعب اختار العمل القريب إلى قلبي،بعتبر جميع أعمالي قريبة لأنني بختار العمل الي بحبه،لكن بحب”الراعي والنساء”لأنه كان بدايتي وفيه ذكريات كثيرة،و”قصةالأمس”و”ذئاب الجبل”أكثر حاجات حبتني فيها الناس وصلوني للجمهور،في أعمال أزعل عليها إنها انظلمت شويا متل مسلسل”سيف الدين الحمداني”الذي أخذت عنه جائزة أفضل ممثلة في العالم العربي لكن لم يأخذ فرصته جماهيريا محدش شاهده،ومسلسل “قاسم أمين “انعرض في فترة لم يأخذ فرصته صح
مسلسل ذئاب الجيل رغم نجاحه وخرجتي منه كنجمة كبيرة لماذ كنتي تقولين أنك ممثلة فاشلة ؟ مع أنكِ تعتزي بالمشاركة به
ذئاب الجبل كانت تجربة جديدة جداً،بعد الراعي والنساء،كان ثلاث وأربع كاميرات حوليا مش عارفة أركز مع أي كاميراكنت حاسة نفسي تايهة،وكان دوري كبيرة متزوجة ومخلفة وأنا في وقتها كان عندي16سنةوبعدين كان صوتي طفل فكان لازم أعمل حاحات تكبرني وكنت ألبس هدوم واسعة عليا قوي عشان أكبر في نفسي فهذه الحاجات كانت قلقاني،لغاية هذا الوقت لما بيتعرض ويتذاع بحس إني كنت لازم أعمله أحسن من كدا كثير جداً
الشللية في الوسط الفني والتي تتبع كثيراً ما رأيك فيها؟مارأيك بهذه الطريقة التي تتبع أحيانا ؟
الشليلة موجودة في كل المجالات ليس فقط في الوسط الفني،لكن هي ليست في مصلحة الجمهور،بحبها لما تبقى تيست ناجح مع بعض،ودايماًبيعملوا أعمال ناجحة بتكون حلوة ،أنا هنا ليست ضدها،بكون ضدها لو نحن مع بعض ونشتغل مع بعض ودور يكون مش مناسب نعطي لحد مننا عشان صاحبنا هنا بتكون فاشلة ومش حلوة وتحديداً في الوسط الفني،العمل مش لينا العمل للجمهور المفروض يراعى هو فيه ،بمعنى لو مطلعة شغل كويس تمام،لكن لو هي مجاملات تجي على حساب العمل ضدها طبعاً
خضتي تجربة التقديم التلفزيوني من خلال برنامج “ضي القمر “على قناة الحدث ما مدى نجاح هذه التجربة !
لم أحب ضي القمر،اتعرض عليا أكثر من مرة وأقنعوني وقالولي جربي،مع أني كنت مترددة في الأول،وقت جربتها فعلا كان معايا حق وكانت تجربة مالهاش لازمة ،أنا لم أحبها الحقيقة ،ندمت عليها
هل تحب ميرنا أكثر تقديم الأدوار الرومانسية أو التراجيدية ؟
أنا بحب العمل الحلو والشخصية الحلوة ،لا يهمني بالعمل رومانسي أو تراجيدي،كل دور له صعوباته يعني الرومانسي لا يقل صعوبة عن التراجيدي،أنا عايزة الدور إلي يشد والدور إلي بحس في باختصار.يعني مثل قصة الأمس بالأول اعتذرت عن العمل لكن لما قرأت العمل اتجننت وقلتلهم أنا فعلا عايزة الدور لأني حبيت دور ميرفت جداً،نفس الحاجة حصلت في مسلسل سيف الدولة الحمداني أيضا رفضت العمل لكن حشرية مني قريت الورق لأنه كان للكاتب العظيم الله يرحمه عبد السلام أمين
بعد ما قريت الدور ونمت شفت الشخصية بعينيا حبيتها حسيت فيها قلتلهم أنا موافقة على العمل
يتعرض الفنانون لمواقف طريفة أثناء الكواليس والتصوير ميرنا وليد ما هو الموقف الطريف الذي جمعكِ بالفنانة الراحلة سعاد حسني أثناء تصوير فيلم “الراعي والنساء “؟
موقف طريف مع سعاد حسني بعد عرض فيلم الراعي والنساء
كنت نازلة السلم وشفت ست عجوز واقفة فقلتلي إنتِ ميرنا إلي شفناها في الفيلم فوق قلتلا أيوة،قالتلي أنتِ جميلة قوي أنا معجبة بكِ،اتشكرتها وبعدين لقيت سعاد حسني مقربة عليا قالتلي ياميرنا عارفة مين الست العجوزة ديه،ديه مامتي بعدين رجعت للست وقلتلا حضرتك إلي عنده بنت زي سعاد حسني ممكن بيعجب بأي حد في العالم ،فقعدوا يضحكوا كلهم وأنا كنت بقلها من كل قلبي،موقف عمري ماحنساه
من أكثر الداعمين لميرنا في حياتك الفنية والشخصية !
الجمهور من أكثر الداعمين لحياتي الفنية،لأني لما بمشي في الشارع وبشوف الحب في عينيهم،والحب في سلامهم عليا ويكلموني بيقلولي بنحسك وحدة من عيلتنا وكمية الناس إلي سمت على اسمي كثير كثير،حب الناس هو الي داعمني في شغلي وحياتي الفنية
حياتي الشخصية الحقيقة زوجي بحسه في ظهري دايما
في بداياتك وقفتي أمام كبار الفنانين فنانين الشاشة والسينما حالياً أمام من الفنانين تود ميرنا الوقوف !
بحب الجيل القديم بشكل مش طبيعي،دايماً بحس أني حستفاد منهم في خبرتهم واستغل وجودهم في الدنيا واتعلم منهم بكون مبسوطة جداً لما اشتغل مع حد قديم عني شوية
الجيل الجديد بستمتع معاهم كأصحاب وشلة وياسلام لو اشتغلنا مع بعض أكثر من مرة ،حالياً بشتغل مع محمد رياض في قيد عائلي في دور زوجته،محمد من الناس الي بعتبروا أخويا واشتغلنا مع بعض أعمال كثيرة جداً بينا عشرة ،بكون مبسوطة وأنا بشتغل معاه
نفسي اشتغل مع أحمد السقابحبه جداً طبعا اشتغلنا في مسلسل قبل كدا لكن لن تقابل ولا بأي مشهد
باقتراب شهر رمضان ماهو جديد ميرنا وأعمالها القادمة ؟
جديدي هو قيد عائلي المفروض يتذاع حالياً،وممكن يتأجل لرمضان،في كلام على عدة عروض لكن لسه لم أدخل رسمياًبأي حاجة
فستان زفافكِ ترك ذكرى سيئة في حياتك لأنكِ لم تشاهديه إلا ليلة الزفاف بسبب ضيق الوقت ..لكن الذكرى العزيزة عليكِ دبلة الخطوبة ماسبب ذلك !
وأنا صغيرة وعمري كان ثماني سنوات طول ما كانت أمي تروح عند الكوافير أكون معاها واقعد اختار في فساتين الفرح،فكان بالنسبة لي اختيار الفستان مهم جداً جداً بقالي عشرين ثلاثين سنة كل سنة بختار فستان فموضوع فستان فرحي ضايقني جدا جداً بسبب تقريب موعد الفرح فالفستان لم تضبط خياطته فرحت عند الخياطة وقطعت الفستان وبعدين قلتلا تتصرف لانه الفرح بكرا فبقيت عندها مواصلة حتى رحت فورا من عندها للصالة
أما الدبلة فكرت بدزاين جديد وعملت اسم زوجي واسمي وحفرته من برا مش من جوا كالمعتاد،فكنت حابة أعمل حاحة جديدة وفرحت بيها
الزواج والأسرة هل أثر على مسيرتك الفنية ؟
أيوه الزواج والأسرة طبعا أثر على حياتي الفنية لأني قطعت خالص،بعد قصة الأمس ونجاحها الكبير كان فرحي بعدها،بعد الزواج مباشرة كنت حامل وعملت مسلسل مع الأستاذ نور الشريف ما تخافوش المسلسل كان طويل بشكل قوي والحمل كان باين وتعبت قطمولي دوري،في السنة الثانية كنت حامل ببنتي الثانية لكن رفضت كل الأعمال وقتها جالي كثير أعمال لكن قلت مش حشتغل تاني وأنا حامل،بعدها بناتي عاوزين رعاية واهتمام فقررت تكون حياتي ليهم والحمدلله مش ندمانة أبدا لأنه كان قراري،لأنه كل حلم في حياتك محتاج وقت علشان تحققيه،وتجي على حساب شغلك ولا تجي على حساب أطفالك لأنه الشغل بيتعوض
كيف علاقتك بالمطبخ وما هو أسرع طبق تقوم بعمله المرأة العاملة في رأيك ??؟
علاقتي بالمطبخ بحب الأكل إلي طالع من المطبخ،لكن مليش خالص بالمطبخ،ولكن أسرع طبق ممكن الست تحضروا وأنا بعملو لبناتي هما بيحبوه المكرونة بلبنة طبعاً هنا ما بيعرفوها في مصرفهذا الطبق سريع التحضير بياخذ مسافة سلق المعكرونة
بكلمة واحدة ماذا يعني لكِ كل من
مايا ومريم:روحي وسبب وجودي في الحياة
الرجل: هو السند
الحب:هو أجمل إحساس ربنا خلقه
اللون الأزرق : أجمل لون في حياتي أنا بعشقه
الأصدقاء: ونس الحياة
الفشل :حافز النجاح
الكره :أعوذ بالله الصفة إلي ما بحبها بالدنيا
