هنا طرق الباب و دخل منه ادهم قائلا بمرح ” هتفضل مدوخني وراك مرة حادثة و مرة ضرب نار “
احتضنت حبيبة فريدة بشدة قائلة ” انتي كويسة صح ؟ “
فريدة ” متقلقيش يا حبيبة و الله انا بخير “
حبيبة موجهة حديثها الى حسام ” حمد الله عالسلامة يا استاذ حسام “
حسام ” الله يسلمك بس اعتقد استاذ دي مالهاش لزمة “
تدخل ادهم قائلا ” انت مبتحرمش يا حسام ”
ضحك حسام قائلا ” انت منستش انت قلبك اسود اوي يا ادهم “
عقدت حبيبة حاجبيها في محاولة منها لفهم ما يحدث لاحظ ادهم ذلك فقال لحسام ” هنسيبك ترتاح شوية انا هاخد حبيبة و فريدة الكافيتريا اتكلم معاهم و هرجع لك تاني “
حسام ” ماشي بس بعد اذنك يا ريت توافق ان حبيبة تروح مع فريدة الفيلا الكام يوم اللي هكون فيهم هنا فريدة عندها مذاكرة و انا مش عاوز اعطلها و في نفس الوقت مش عاوزها تبقى لوحدها “
ادهم ” خلاص مفيش مشكلة “
حسام ” عالعموم السواق زمانه في الطريق “
ادهم ” ما قلنا خلاص اتخمد و ارتاح بقى “
خرج ادهم مع حبيبة و فريدة قالت له حبيبة ” والله العظيم يا ادهم مش هتحرك من هنا الا لما افهم كل حاجة “
ضحك ادهم و فريدة و قال ” خلاص هقول لك بس نطلع نشرب اي حاجة …. و انتي يا فريدة شكل حسام قال لك كل حاجة “
فريدة ” اه بس مش بالتفصيل يعني “
ادهم ” طب يلا بينا و انا هحكيلكم كل حاجة “
———————————————————————
” احسن اهو كدة حاسة اني ارتحت “
قالت بيري هذه الجملة بحقد شديد
شروق ” ايه اللي حصل “
بيري ” البيه اللي عامل لي سبع رجالة في بعض اخد رصاصة في كتفه بس للاسف مخلصتش عليه “
شروق بذعر ” قصدك حسام … ليه ايه اللي حصل “
بيري ” راح ينقذ المحروسة اخته اخد طلقة بدلها يا ريتها كانت موتته عشان ناري تهدي “
شروق ” يا بنتي حرام عليكي بقى سيبيه في حاله ….. مش كنتي دايما تقولي انه خانق عليكي و بتكرهي تحكماته …. مش كنتي ناوية تسيبسه … خلاص اهي جت منه و هي سابك “
بيري ” انا اسيبه اه …. لكن هو يسيبني ؟ ….. لا طبعا ؛ انا اسيب متسابش “
شروق بحزن على حال اختها ” بصي بقى اخر كلمتين هقولهم لك عشان ابقى ريحت ضميري ….. انتي مش احسن من الناس يا بيري …. كفاية تكبر على الناس و معاملتهم كأنهم من الزبالة و احنا اولاد القصور …. نضفي قلبك يا بيري …. شيلي السواد من جواكي عشان ترتاحي “
بيري بلامبالاه ” على العموم الموضوع خلص خلاص انا وقعت على واحد احسن من حسام 100 الف مرة هيحقق لي اللي انا عاوزاه و هي اللي فعلا يستحق جمالي “
———————————————————————
” يعني انت عارف طول الوقت ده يا ادهم “
نطقت بها حبيبة بعد ان علمت معرفة اخيها بحسام …
ادهم ” ايوة طبعا يا حبيبة كنت عارف انه ادهم صاحبي من اول مرة شفته فيها حتى هو معرفنيش من اول مرة بس يمكن عشان الظروف اللي كان فيها “
حبيبة ” طب و مقلتليش ليه من ساعتها بقى يعني ينفع تفضل سايبني كدة زي الهبلة و هو عمال يقول خطيبته و مش عارفة ايه “
ردت فريدة بضحك ” متقوليش زي بس لانك كنتي هبلة فعلا “
حبيبة بغيظ ” ابعدي عني يا فريدة دلوقتي احسن لك انا ولا طايقاكي و لا طايقة اخوكي “
رن هاتف فريدة و قالت لحبيبة بضحك ” طب يلا عشان السواق وصل انا نفسي انام و اقوم اتصل بصحابي اشوف اخدوا ايه الفترة اللي غيبتها دي والله انا حاسة ان السنة دي نحس عليا اوي كل ما انتظم في الدروس تحصل حاجة فهو حاجة من الاثنين ياما السنة دي نحس سأما انا اللي نحس “
حبيبة ” طب يلا ياختي “
استوقفها ادهم ” حبيبة قلتي ايه في طلب حسام ؟ “
حبيبة ” استني يا ادهم لما يخرج لازم اتكلم معاه الاول “
ادهم ” عندك حق “
———————————————————————
في السيارة العائدة الى فيلا حسام سألت فريدة ” حبيبة هو انتي ممكن متوافقيش على حسام “
حبيبة ” يا بنتي المواضيع دي مبتتاخدش قفش كدة لازم الاول اتكلم معاه و نشوف طباعنا زي بعض ولا لا و نشــ ….”
قالت حبيبة متذكرة ” اه صحيح مش اخوكي خاطب “
ضحكت فريدة و قالت ” بعد كل الكلام ده لسه فاكرة تسألي دلوقتي عالعموم يا ستي حسام فسخ خطوبته من بيري “
حبيبة ” نعم يعني لسه فاسخ خطوبته و جاي يتقدم لي بعدها على طول كدة مينفعش طبعا “
فريدة ببراءة ” طب ليه والله انا نفسي اوي تكوني مرات حسام “
حبيبة بجنان ” يا حبيبتي مينفعش يكون لسه خارج من تجربة و يدخل في تجربة تانية لازم ياخد وقت عشان يفكر يشوف ايه الاخطاء اللي حصلت في التجربة الاولى و خليتها تفشل و ايه الحاجات اللي عايزها تكون في البنت اللي هيتجوزها و ملقهاش في البنت اللي سابها عشان لما يجي يختار يختار صح و العلاقة تبقى قوية لكن انه يدخل في تجربة جديدة بعد تجربة فاشلة بوقت قليل كدة العلاقة هتبقى عاملة زي الازاز الضعيف اقل خبطة فيه هيتكسر 100 حتة …. و هو كدة محسسني انه عاوز يخطبني عشان ينسى خطيبته الاولى يعني بيدخل في حب جديد هو مش مستعد له عشان ينسى حب قديم جرحه و انا مقبلش على نفسي حاجة زي كدة …. عرفتي ليه بقى انا مش موافقة ؟ “
فريدة ” ممكن يكون عندك حق يا حبيبة في كل اللي قولتيه …. بس في غلط صغير في الفهم عندك لو فهمتيه كل الكلام ده هيتصحح “
حبيبة ” غلط ايه ؟ “
فريدة ” ان حسام اصلا محبش بيري هو قال لي انه كان ناوي بسيبها قبل ما بابا يتوفى بس جه موت بابا و ظهوري في حياته و المشاكل اللي حطيته فيها ربكت له الدنيا حسام لو كان بيحب بيري بجد مكانش عمره هيسيبها و هو قال لي ان اللي حسه ناحية بيري مكانش حب لكن اللي حسه ناحيتك كان مختلف تماما …. احنا ممكن نقول شعوره ناحية بيري كان مجرد اعجاب … لكن ناحيتك مش عارفة هو حاسس بايه لانه غلس عليا و مرضيش يقول لي قال لي هي احق انها تعرف الاول “
حبيبة ” ممكن يكون كلامك صح و ساعتها اصدق جملة الدكتور مصطفى محمود لما قال : حكايات الحب الاول مادة جيدة للذكرى …. لكنها لا تصلح لتكون مادة حياة و زواج “
فريدة ” انتي الدكتور مصطفى محمود ده واكل لك دماغك ….. بس يعني ايه الجملة دي “
حبيبة ” ساعات يا فريدة بحس ان عقلك كبير و يفهم اي حاجة ….. و ساعات بحس ان عندك براءة و سذاجة لدرجة العبط …. المهم الجملة معناها ان في ناس فاكرة ان الحب الاول ده افلاطوني و هيفضل خالد طول ما الانسان عايش بس مصطفى محمود شايف ان الحب الاول ده ممكن نعيشه و نفضل نفتكره طول حياتنا بس مينفعش هو يكون حياه نبني عليها مستقبلنا و جوازنا …. فهمتي ؟ “
فريدة ” فهمت ” ثم نظرت من النافذة و قالت ” اخيرا وصلنا “
احتضنت كريمة فريدة و قالت ببكاء ” انتي كويسة يا بنتي “
فريدة ” والله يا دادة كويسة اوي الحمد لله “
كريمة ” و حسام بقى كويس دلوقتي انا عاوزة اطمن منك مش من شادي “
فريدة ” والله كويس يا دادة بس بالله عليكي بقى جهزي لحبيبة اوضة لاننا بجد هلكانين “
———————————————————————
دخلت كل فتاة الى غرفتها لكن فريدة قبل ان تقوم بفعل اي شيئ ذهبت الى مذكراتها الوردية التى افتقدتها كثيرا و كتبت :
“#اخي…
يا من جعلته لي الايام عونا و سندا ….
كنت لي افضل صديق .. و خير ناصحا .. و احن قلب .. و احسن سند…
علمتني معنى صداقة الاخ باخته…..
جعلتني اشعر بالقوة في لحظات ضعفي..
و بالامل في لحظات يأسي ….
حفظك الله لي من كل شر و ابعد عنك كل سوء ……”
ثم اغلقتها و تحممت و نامت في فراشها في ثواني معدودة فلأول مرة تشعر بالامان في منزل ابيها و لاول مرة تشعر بحب اخيها و حنانه عليها و لأول مرة تشعر بمتعة الحياه …. و رغم ما تعرضت له من بعد موت ابيها الا انها علمت ان لكل شيئ حكمه لا يعلمها الا الله فلولا خطفها لما كانت عرفت قيمتها عند اخيها و لما كان اخيها فكر بالزواج من حبيبة
