يوميات الفيس بوك
الفيس بوك زي البلكونه, لما الواحد يطلع ينشر الغسيل يلاقي الجيران مركزين ومنتقدين في اللي يقول هي ليه طالعه من غير حجاب مع إنها محجبه واللي يقول ليه طالعه من غير نقاب مع إنها منقبه واللي يقول … إممممم تخنت قوي واللي يقول دي قربت تقرع واللي يقول والنبي لما تعمل إيه ما أنا معبرها واللي يقول منافقه مهما عملتي ومرات الغفير تقول كفايه إنها عندها غساله وعفشة ميه وبتاع الفول على الرصيف اللي قدام بيتهم يقول جوزها رزل وأولاده مغروريين وهي ست مجدع وممكن عكس كل الأدوار بعد 10 دقايق عادي وفي اللي شاغل باله الشقه بالبلكونه دي تمليك ولا إيجار!!! هي لامؤخذه ما لهاش جوز!! أمال مين اللي قانيها !!! ورغم إن كل واحد شايف الصوره بمخيلته إلا إن الصوره الأصليه ستبقى غير معلنه ولا مرئيه لأنها بتنشر الغسيل وهي مكتومه ما فتحتش بقها ولا حد إطلع على قلبها وفكرها …. خدوا صور زي ما إنتو عايزين صورة قلبي وفكري لي أنا وربي فقط. ( إن الله لا ينظر إلى أجسادكم , ولا إلى صوركم , ولكن ينظر إلى قلوبكم )
