صورة أرشيفية
بقلم مها نور
عزيزي أدم عايزة اقولك همسة صغيرة أوي بيني وبينك ياريت تسمعها وتحسها وتفكر فيها وفي نتايجها فكرت في يوم لو شريكة حياتك اللي كانت ماليه عليك الدنيا فجاة اتغيرت وبطلت تتناقش معاك وتحاورك اوعي تفتكر أن ده تسليم للأمر الواقع بالعكس هى بس إتأكدت من اكتر من موقف إنك بدأت تبعد عنها ومعندكش استعدداد تسمعها زي أيام زمان أيام الحب والرومانسية
مش بس كدة فكرت ايه ممكن يكون السبب لو فجاة لاقيت نصك التاني بطلت تكلمك عن الاحداث اللي مرت بيومها مع أهلها واصحابها واولادكم اوعي تفتكر أن خلاص مبقاش في جديد تحكيه بالعكس دا بسبب احساسها أن مبقاش في فايدة ولا اهتمام بمشاكلها وانك مش هتساعدها فبطلت تفضفض وتشتكي لك همومها وفضلت تكتمها
فكرت لما حبيبتك اللى كانت زمان بتبكي لو سمعت يوم منك كلمة توجعها أو تجرحها فجاة تلاقيها مبقتش تتأثر والدموع بقت في عيونها تتحجرايه السبب أوعي تتخيل أن ده اسمه نضج وانها عقلت وبدأت تفهم بالعكس هي بس بدأت تتأكد أنك بطلت تحس بمشاعرها وتقدرها وتخاف دمعه من عيونها تنزل بسببك فامش عايزه تكسف نفسها
فكرت لومرة وحدة لاقيتها بطلت تكلمك ومبقتش حاسه بوجودك في البيت ايه السبب علي فكرة دا مش معناة انها خلاص بقت مشغوله وليها اهتمامات تانيه لا خالص هي بس بدأت تحس أنها تقيله وعبء عليك فبطلت تزعجك وتقلقق.
فاكر زمان لما كنت بتحاول تستفزها وتقارنها بجمال ورقة صحبتها وكانت تزعل وتتخانق وتغضب وانت تضحك وتحس بنشوي انها بتغير عليك فجاة دلوقت لاقيتها مبقاش يفرق معاها تقارنها بوحده ولا حتي عشرين اوعي تتخيل أن ده لا مبالاة أو انها مبقتش تحبك لا خالص ده مجرد هروب منك عشان متحسش بوجع قلبها وكسرته قدامك
فاكر لما كانت بتترجاك تقعد معاها وتتخانق معاك عشان نفسها متسيبهاش لوحدها ومع ذالك تنزل تقعد مع اصحابك وتسهر وتسيبها وحيده مع وحدتها وحزنها دلوقت بقت تفضل تسكت وتروح تتكلم مع صحباتها او حتي تدخل تنام وسط ولادها وتسيبك تنزل وترجع علي راحتك اوعي تفكر أنها عقلت ومتفهمه أنك من حقك تنزل تتفسح مع اصحابك لنص الليل وهي واجبها تقعد في البيت مع ولادك لا خالص هي بس بدأت تفهم مقولة والدتها اللي كانت بتسمعها زمان الحنية مبتتشحتش.
عارف لما شريكة عمرك فجاة تقرر انها مش هتسألك تاني عن شغلك والأحداث اللي بتحصلك طول اليوم وتبطل تقلق عليك لو اتأخرت ومتتصلش تطمنها وتبطل تحكي ليك في حجات ملهاش لازمه لمجرد انها عايزه تحس بوجودك معاها وتتونس بصوتك ونظرة عنيك اوعي تتصور أن ده اهمال منها صدقني لأ هي بس تعبت واتوجعت من كتر ما كانت بتسمع كلمة كفايه يازنانه وانا مش عيل صغير عشان تقلقي عليا عارف انت وصلتها لايه وصلتها انها مبقتش لاقيه نفسها معاك ولا عارفة تراضيك ازاي
بعد كل الكلام ده عرفت الفرق بين حبيبتك زمان ودلوقت انهي فيهم احسن انهي فيهم حسسك بالحب والمودة والاحتواء والخوف والقلق عليك
فى فرق كبير اوى بين واحدة كانت فى الاول كده وواحدة بطلت تعمل كده الاولى كانت بتحب اوي والتانية تعبت من عدم تقدير الحب خلي بالك منها حسها قبل ماتحبها مراتك مش فازة في البيت ولا كرسي مركون جنب الحيط مراتك سكن ليك وستر وغطي عليك حافظ عليه.
