على هوايا
بقلم :إخلاص عبد المحسن
الموضوع باختصار عن الصداقه على الفيس بوك و عن كمية النفاق و التملق و (الأفوره) في المجاملات على حساب الحقيقه و الحق
تلاقي الواحد من دول مصاحبلك بال 5000 صديق و ما يعرفش منهم غير عدد محدود و بالتالي صعب يحفظ توجهات باقي العدد و معتقداتهم و أفكارهم
أول ما يحصل أي موضوع و نبدأ نقلب محللين سياسيين أو كرويين أو أيا كان موضوع الحوار
تلاقي النقاش احتد و الصراع احتدم و الأمر يبدأ يتعقد و الكومنتات تقلب خناقه و ردح بلدي و اللي شايف السته تسعه و اللي شايف التسعه سته كل واحد مقتنع بزاويته
تبدأ تنزل بوستات جديده على صفحة أخينا اللي نزل البوست الأولاني و يبدأ الشجب و التنديد
اللي مش عاجبه كلامي يحذفني و لو ما حذفنيش حبلكه و أفلام هنديه و حوارات و حبشتاكانات
طبعا كل واحد ياخد جنب و يحذفوا بعض و اللي ما يحذفش و لا يتحذف و يراقب من بعيد و يضحك في سره
طبعا ينزلك بوست جديد بعدها .. جاري تنظيف الأكاونت
و شويه يرجع تاني ينزل كلام تلقيح و يكتبلك تحتها هاشتاج #مقصوده
و كل واحد بقى فاكر نفسه ملاك أو نبي مرسل
طبعا الأكاونت أول ما ينضف على حد تعبير أخينا تلقى بقا الحياه معاه بقت لوز العنب
يبدأ ينزل بوستات من هنا التطبيل يشتغل
و على هوايا يا ليل
كل اللي على هواه بس يتكتب أما اللي يكح ده نفرمه على طول
بقيت اشوف الكومنتس اتصدم و خصوصا لو كلام أخينا ده كلامه غلط أو فيه جزء غلط محتاج نقاش أو إبداء وجهات نظر أو تبادل آراء باحترام
ألاقي كل التعليقات من نوعية على هوايا
….
و إذا ما كنتش على هوايا أرجوك حل عن قفايا
عجبت لك يا زمن
أشوف البوست السياسي من دول ألاقي كل الآراء زي بعض
البوست الاجتماعي … برضو شبه بعض
أفهم على طول ان الأكاونت ده متفلتر و معمول له تنضيف
يا سلام على الجمال .. بيبهروني و الله
فين ثقافة الإختلاف .. نسفناها طبعا
أومال !!!! هو احنا ينفع نختلف!!!!
عائلات قاطعوا بعض بسبب خلاف في آراء
و كمان جرايم قتل حصلت بسبب بوستات ع الفيس و كلام فاضي
لأ و كمان اللي يخاصم حد أو يقاطعه يفرض عليك تقاطعه لزوم استمرار الصحوبيه
ماهو ما ينفعش تصاحب عدويي و إلا انت كمان تبقى عدو زيه بالظبط و نلغي الصداقه
اللهم لا اعتراض .. الدنيا قصيره مهما طولت على فكره
بشوف ناس تحذف ناس لمجرد شافتهم كلموا حد مش على هواهم .. بدون أي ذنب أو جرم
يا تبقى على هوايا
يا تحل عن قفايا
و كمان ما ننساش التحفيل و الزيطه اللي بيظيطوا فيها على ماتشات الكوره و صورة فلان و هو صغير و الفلوس بتغير و الحوارات إياها
و لو دورنا في ألبوماتهم القديمه مش بعيد ينتحروا من الصدمه !!!!!!
لكن نقول إيه !!!!!!! كل واحد نصب نفسه حاكم و جلاد و شاف باقي الكون مذنبين
لا حول و لا قوة إلا بالله
بالله عليكوا إرتقوا بقا عشان خنقتونا و خليتونا نحس أحاسيس تضايق و تتعب احنا في غنى عنها
ربنا يهديلنا أنفسنا جميعا و نرجع لصوابنا بقا
