بقلم دكتورة زينب زكى
الوحدة دايما خير من جليس السوء .. هى دى المشكلة اللى بتقابل الناس الحساسة اللى دايما بيفضلوا العزلة اكتر من التواجد بين الناس .. الناس دى مش ناس كئيبة ولا نكدية .. كل الموضوع ان تركيبتهم تركيبة من نوع خاص جدا ..
ناس بتفرح من قلبها لما بتشوف تفصيلة صغيرة مبهجة .. وبتزعل بردوا من قلبها لو حصل حاجة بسيطة أثرت فيها بشكل سلبى ..
ناس دموعها قريبة .. وضحكتها أقرب .. ناس روحها هشة مش بتستحمل العلاقات المرهقة والانتقاد اللاذع والمشاعر المعقدة .. ناس أى حاجة بتسيب أثر جواهم سواء حلوة أو وحشة ..
الناس الحساسة دى هما الناس الحلوة المبهجة والجدعة والرومانسية .. هما أكتر ناس تركيبتهم دى بتتعبهم وبتصعب الدنيا عليهم لأن صعب تحس زيهم أو حتى تتوجع زيهم ..
فمن فضلك ..
إحترم مشاعرهم .. وإنفعالاتهم .. وردود أفعالهم .. مهما كانت مرهقة .. ومش منطقية .. بالنسبة ليك ..
لأنها حقيقية ومش مزيفة ..
ماما زوزو
