تحذير الأنتحار متكرر
بريد القراء
بقلم-هويدا صابر
بعد كل تجربه صادمه في حياتنا لازم نسمع أهم كلمه يارب تكون أتعلمت ومتتكررش غلطك تاني ، والمره الجايه تكون صاحي لنفسك ، لكن في ناس بتكون مصممه مع سبق الأصرار والترصد علي مواجهة مشاكلها وصدماتها بنفس الطريقه ، أول مره زي تاني مره زي تالت مره لا وفي الرابعه كمان أزااااي دي الرحمه حلوه.
دي تجربة السائلة الكريمة س ج:
أنا انسه خريجة كلية الفنون الجميلة عندي 25 سنة وحيدة أبويه وأمي وهما منفصلين من زمان وانا عندي 6 سنين ، وأمي كانت كل حاجه ، وانا في ثانوي حبيت ابن الجيران وأتفجأت انه بيحب واحده تانيه رغم انه كان بيكلمني وأنا طالعه ونازله وانتي حبيبتي أنتحرت أخدت شريطين دواء وأتعملي غسيل معده وأمي عرفت السبب لأني بقولها كل حاجه ، وفي الجامعه حبيت زميلي واتعلقت بيه ولما قالي أنه مش هينفع يتقدم لسه جيش ومسؤوليه وهدور علي شغل وأتحجج رغم اني قولتله ماما هتساعدنا لقيته عايزني أجيبله انا فلوس من ورا ماما عشان رجولته وشكله فأنتحرت بس المره دي ب 4 شرايط دوا وبردوا أنقذوني وغسيل معده وماما كان هيجرالها حاجه مني ، أتخرجت وأشتغلت واتعرفت في شغلي علي زميل ليه متجوز حبيته أوي واتعلقت بيه طلع بيستغلني ادفعيلي الفاتوره دي وعايز فلوس أو عايز يدفع أقساط شقه وكان بيقول أنها هتكون شقتنا ، ماما عرفت قالتلي انا عندي أستعداد تجوزيه لو اتقدملك وصدق مع ان دا مش هيحصل صدقيني بس يارب متنتحريش زي كل مره ، وفعلا أتهرب من الجواز ومراتي وبيتي مش عايز مشاكل فأنتحرت المره دي يمكن أصعب عليه ويرجعلي أو أموت وأخلص كلمته قولتله هنتحر وقطعت شريان أيدي اليمين وأنقذوني وطبعا مرجعش لأنه ندل وجبان ، بعدها زميل لينا أتقرب مني وأتقدملي وأتخطبنا وحسيت بنفسي جدا المره دي ، لكن أمه كانت رفضاني وبتنتقدني في حاجات كتير وبتقول أني مستهتره ومعنديش ذوق وانا بصراحه كبرت دماغي وقولت أنا وهو بنحب بعض ومتمسك بيه مش مشكله أمه المشاكل كبرت بينا وهو بقي يقولي أزور أمه أرفض تتعب بردوا مروحش ، هو غضب وأتصل بيه قالي كل شئ قسمه ونصيب أمي مش هتتعوض أنتي تتعوضي ، أنهرت وأنتحرت قطعت شريان أيدي الشمال وروحت المستشفي أمي أغمي عليها وقالتلي حرام عليكي جبتيلي المرض ، أنا هبعتك لأبوكي أنا خلاص هموت منك ، أنا عارفه أن دا كله غلط بس أنا فكره أني أخسر حد بتموتني ومبعرفش أفكر وقتها..
السائلة الكريمة:
أنا سرحت في تفكيرك 4 مرات أنتحار وليه الغريبه أن اول 3 تجارب كانت فاشله ولا تستحق ان عمرك يضيع عشانها رغم انك عندك أمك بتسمعك ومحتوياكي جدا وشايفه منها كل دلع وحنيه هل دا غلط منها ، كان لازم تلجأي لحضنها في كل مشكله بدل الأنتحار أللي بتهددي بيه مين مش عارفه أمك هي الوحيده أللي بتاخد صدمات أنتحارك مش كل واحد عرفتيه وخرج من حياتك ، وأخر مره أنتي غلطتي أنك عملتي راسك براس أمه زي ما بيقولوا ولعبتي علي نقطة بيحبني وقالي مش هيسيبني أتغريتي في نفسك للأسف ، لو كان باع أمه عشانك كان هيبيعك أكيد ، أنتي الضعف مسيطر عليكي زائد رفضك لتقبل الأمور لو مكانتش علي هواكي ، أي حاجه ياله قومي انتحري وهنتحر أزاي المره دي ، بلاش ضعف وأستهتار أرواحنا مش رخيصه ولا لعبه ، راعي ربنا في أمك ونفسك وأتقربي منه وأستعيني بيه هتقوي ، والأنتحار نوع من أنواع الاعتراض علي حكم ربنا أللي دايما بيكون فيه الصالح والخير للأنسان وأكيد هيعوضك وهيرزقك بكل خير.
