علي خوانه
بريد القراء أعداد: هويدا صابر
تحب تكره ترفض تترفض دي مشكلتك لوحدك وأنت وحيد كفيل بيها ، لكن تدخل أنسان برئ ملوش أي ذنب في لعبه ويكون سلم عشان توصل للي أنت عايزه ولا يفرق معاك جرحه وألمه ، كله سلف ودين مفيش مفر.
دي مشكلة السائلة ل ط:
أنا أنسه عندي 26 سنة اتخطبت لشاب من عمري وحبيته جدا وكان بيقول أنه بيحبني وزيارات ومتفقين في كل شئ والأهل بيحبوا بعض ومفيش أي مشاكل وكنا بنجهز الشقه وخلاص هنحجز الفرح بعد شهر خطيبي أبتدي يتغير وقرر يفسخ الخطوبه وكل ما حد يكلمه يرد يقول خلاص مفيش نصيب مش عايزها أنا حر وأهله يكلموه مفيش فايده لحد معرفنا السبب أنه قرر يرجع لحبيبته أللي أبوها رفضه كلمته وقالتله يرجعلها وأن أبوها هيوافق لأنها أقنعته ، وطبعا كنت أنا لعبه خطبني عشان يغيظ فيهم وتتحرك هي وأهلها ، أنا أتصدمت وحاسه أني أنكسرت وشويه أحس أني كويسه وشويه أنهار غصب عني مش عارفه أصبر نفسي أزاي.
السائلة الكريمة:
هو غدر بيكي فجأه وزي مابيقولوا خدك علي خوانه ، وبتجهزي بيتكم وخلاص شهر علي الفرح ، دا أنسان ملوش أمان والحمدلله أن الموضوع أنتهي في التوقيت دا لأنه ممكن كان يسيبك بعد الجواز ومعاكي طفل عادي عنده عشان يرجع لحبيبته ، ولا يستحق البكاء عليه لأن مفرقش معاه مشاعرك وحجم الألم أللي بتعاني منه أنتي وأهلك ، أحتسبي وأدعي ربنا يعوضك خير وأشغلي نفسك في شغلك في رياضه أو أي شئ يسعدك ، وأهتمي بنفسك وأقوي عشان تقفي علي رجلك بسرعه وتعيشي حياتك صح مع الأنسان أللي يحبك بجد ويقدرك ، وربنا يحفظك وييسرلك كل خير.
