راضى….
شعر …شريف الهمامى
لون نيلى ف عز الضهريه فضى
ولون حبيبتى أسمر على خمرى
منتظر ليا سنين واتارى العمر بيعدى
وحبيبتى بعيده عنى ياما ومش بيدى
وحاولت أرجع تانى ليها
لقيت آلف سؤال فى عنيها
يالل انت منى ليه بعيد عنى
يالل انت منى ليه رافض تحررنى
جاوبت
وتوهت
وتاهت جوايا نفسى
فى آلف سد قدامى عنك بيمنعنى
يابنت الناس
ليه جحودك
ليه جمودك
ليه قسوتك وموتك
بايدك
شيلى عنى غضبك وجنونك
انا منك وبعلنها
راضى بكل حاجه فيكى
راضى انى اكون مطحون
راضى انى اكون مسجون
راضى اديكى قلبى بايدى
علشان يبقالك قلبين
وتعيشى ليا آلاف السنين
وتعيشى ليا آلاف السنين…
