.. بقلم احمد الشيخ
ولاَ يِعرَف لِلِمَخاض أَلم
إِلا الأُم وصَاحِب قَلَم
ولاَيفهَم دَمعَة لِلنَاى
إِلا اِللى إِتظلم
ودَرويِش هَايم
ف مَلكَوُت النَغَم
وعقوُل تِتِمِسح وتوجَعنا
……………….
تَاه اللفَظ ف المَعنى
والكِلمَه ف المَغنى
وانتَهَى م الساَمِعِين
سِر طَعم الشَجن
بنَظرَه ف الأَكواَن
مع قَهوَةِ الفِنجَان
لَذه تِرجَعنا
………….
دَراوَيِش الحَق والثوَرَات
مِن ابن بِنت النَبى
سِيدنا الشَهيد الزين
كِلمِة الحَق الحُسين
اللى صُورتُه بتتكَرَر
وسِيرتُه بتِطَهَر وبتنوَر
وبتشَاوِر عَلى الحَق فِين
مَايكون , اقفِل بَرَاح الكُون
اه ياعَمى يامَفتون إنشِد وسَمَعَنا
…………..
كُل اِلِلى فيِكى يَزيد
كُل تَواَرِيخِك عَاشورا
كُل شَواَرعِك كَربلاء
ذِكرَى وَمحفُورَه
ف كُل حِتهَ حُسين
والدَم عَ الجَنبين
بِيزَيِن الصُورَه
