#شعر…شريف الهمامى
على قهوة فى باب اللوق
وسط الزحمه وكل شئ صبح مذنوق
لقيت ايدك بتتمدلى
كتفك جنب كتفى بيسندنى
وبتعكز ع الأحلام
وعنيكى زى ماهى بصالى
فرحانه ومش سيبانى
وضحكه طالعه من الجوف
ومسكت ايد من غير خوف
على قهوة ف باب اللوق
واحد قهوه وواحد شاى
وعمر رايح ومش جاى
وبنت ضفايرها مفرودة
وكام حلم وطريق مسدودة
وفرحه بتعافر الأحزان
وصمت بيعاند كل بيبان
الكلام
والأوهام
ونتوه من تانى ونعافر
ونكابر
ومنستسلمش
ونطير بقلوبنا لفوق
على قهوه ف باب اللوق
وزحمه كتير وعربيات
وليه نبكى ع عمر عدى وفات
ماكفياكى ياعين وجع وأهات
وتعالى نطلع بروحنا مره
لسابع سما
ونبعد عن حياتنا المره
مش كفايه سكر شايك طلباه بره
ونحلم بحياه كلها شوق
على قهوة فى باب اللوق…
