الصداقه الممنوعه.
بريد القراء أعداد: هويدا صابر
مش كل شئ بتعاني منه في حياتك يتقال ، لا ويتقال بتفاصيله كمان علي أمل أللي أن هتحكيله وبتفضفض معاه هيريحك ويساعدك في حل مشاكلك ، ماهو بفضفضتك دي معاه وقت الضيق عرفته نطق ضعفك ، خصوصا لما يكون المخلص الوفي دا أنت أتعلقت بيه وهو كمان أبتدت نظرته ليك تتغير ، ومساعدته ليك هتكون خيانه وضياع ليك ولحياتك.
هنعرف حالا معني الكلام دا لما نقرا مشكلة السائلة الكريمة: أ م.
أنا عندي 26 سنة ومتزوجه من شاب عنده 27 سنه وعن حب وعندي بنت عمرها 3 سنين ، كل مشكلتي أن زوجي مقصر جدا في العلاقه الخاصه معايه تقريبا كأن مفيش ست في البيت ، ومهما لبست أو عملت أي شئ جديد في شكلي كأنه مش شايف ، وأحنا خارجين سوا يمشي قدامي بمترين وسايبني ورا كأني مش تبعه ، والوضع بينا زاد سوء ، وأشتكيت لأمي أكتر من مره ، وطلبت منها أننا نطلق ، قالتلي وبنتك أوعي يكون في حد مشاغلك ومحسسك أنك جميله وبيسمعك الكلام أللي جوزك مبيقولوش ليكي ، سكت لأن دي الحقيقه أنا كنت بحكي لزميلي في الشغل وهو كمان بيحكي مشاكله ليه وكل واحد فينا كان بيعاني من أهمال الطرف التاني ، ومره في مره لقيته فعلا بيقولي كل كلمه انا محرومه منها ، وأبتدينا نغير علي بعض ، وبلاقي نفسي وأنا بتكلم معاه بالساعات ، وبقينا واحد وراحتنا مع بعض ، لكن الوضع دلوقتي أتغير أنا عايزه أتطلق وأتجوزه ، مش عايزه أحس اني خاينه ، لكن لما عرضت عليه أتحجج ولقيته بيكلم واحده زميلتنا جديده ومتقرب منها ، وفي مره لقيتها سايبه موبايلها فتشت فيه شوفت رسايل بينهم ، أتعصبت عليه وأتخانقت أنكر كل دا ، أنا تايهه ومش عارفه أعمل أيه ، شوري عليه أرجوكي وأن شاء الله هستجيب لكلامك.
السائلة الكريمة:
أولا زوجك من النوع المهمل ودا بيكون أتربي علي أن الست عباره عن صفر علي الشمال فبالتالي بيكون مفيش ذوق أو أهتمام وأحترام في التعامل معاها ، وصفات الرجوله كلها بتكون معدومه عنده ، ثانيا مفيش حاجه أسمها صداقه بين رجل وأمرأه في مجتمعنا العربي ، لأن تقريبا أحنا بنعاني من خلط في الاوراق زي مبيقولوا ، وإذا وجدت الصداقه أو الزماله تكون في حدود ليه أحكي تفاصيل حياتي الخاصه جدا ، وزميلك في العمل يكون عارف العلاقه الخاصه بينك وبين زوجك حصلت أمتي وأزاي ، تبقي دي صداقه ، وأنتي كمان عارفه عنه هو ومراته كل شئ وحياة كل واحد فيكم كتاب مفتوح للتاني ، سامحيني دا شئ هزلي وقمة الأستهتار ، عندك مشاكل مع زوجك زي متكون حتي لو في العلاقه الخاصه ومتضرره ، في أهل ممكن يتدخلوا ويتكلموا معاه أكتر من مره ، الكلام منفعش وكرهتي العيشه معاه في طلاق وخلع ، ورجاااااااء الحياه الزوجيه مش سجن أبدي عشان أكون مغلوبه علي أمري وأستسهل لا دي حياه ينفع الخروج منها في أي وقت هي مسألة قرار بس ، والفضفضه مع صديق أو صديقه لازم يكون فيها حذر وفي حدود ومش كل شئ يتقال ، ما خاب من أستشار لكن أستشار مين ، نفوق لنفسنا ولعلاقتنا ونعمل حدود وخطوط حمرا ، وبعدين أنتي أللي عرضتي عليه الزواج يعني هو مش فارق معاه بيتسلي وبيفضفض وكان ممكن الأمور تتطور بينكم للأسوأ وتنجرفي في طريق الخيانه ، وأوعي تفتكري أن خيانتك لزوجك وقتها هيكون مبررها أنه مقصر معاكي حتي لو كان فعلا مقصر معاكي في كل شئ ، الخيانه ملهاش مبرر ، لأن الأبواب مفتوحه قدامك وقرارك أنتي حره فيه وتقدري تنفصلي ، لكن عايزه تكملي مع زوجك أتكلمي معاه بصراحه أنتي الأول مفيش أستجابه ليكي ، أستعيني بحد من أهلك أو من أهله يتكلموا معاه زي مقولتلك ، عايزه تنفصلي أنفصلي لكن تحوطي علي بنتك وتحافظي علي نفسك وتخافي عليها ، عايزه تتجوزي تاني محدش هيلومك أبدا وأحسني الأختيار ، وأبعدي عن زميلك نهائي وياريت ميعرفش عن حياتك حاجه بعد كده حتي لو أنفصلتي متقوليش لأنه مش هيفرق معاه وأحتمال يلف حواليكي للتسليه بس مش أكتر ، لأن دا انسان مستهتر ولعبي وأنتي شوفتي بنفسك حوراته مع زميلتكم الجديده رغم أني مش لاقيه مبرر لتفتيشك في موبايلها دي جرأه منك ودليل علي أن عقلك بقي ملغي مبتفكريش صح ، وكلامي دا عشان لو حصل وقررتي الأنفصال أحتمال كبير تقولي يمكن عشان كنت متجوزه أتحجج وتبرري أفعاله معاكي ويكون في نظرك شهيد الظروف ، لااااااا ، أبدأي صفحه جديده صح ونضيفه وأحتفظي بأسرارك لنفسك ، وأسأل الله لكي الهدايه وصلاح الحال.
