بقلم بيشوي مجدى
قام م الكوشه وساب كرسيه
شاور على والدته بإيديه
وطا وباس رجليها اوام
واستسمحها تقوم وياه
كانت امه وشالت همه
كانت مرسى وشط نجاه
كان ملكوتها الابن وقوتها
انه يعيش مرتاح البال
واما الابن اختار له عروسه
صار متدهور بيه الحال
بنت اكابر شعرها سايح
وامه يا عينى فقيرة المال
وقت بجد حقيقى عظيم
وسط السهره والمعازيم
همست ودنه امك عره
لو تسمح وديها ل بيتها
امك فعلا موضه قديمه
وانا فعلا عمرى ما حبيتها
جاى تكسفنى ف وسط الناس.. على اى اساس ؟..
اصلا كل الناس عارفين ..امك مين !!
بيئه وعره ومش ولابد
يبقى هتيجى فرحنا ازاى
وازاى اصلا تسمح لامك
تحضر وسط الناس الهاى
قام م الكوشه و ساب كرسيه
شاور على والدته بايديه
بص لامه بصه غريبه
محدش فاهم معانيها
قال وبنبره غريبه ساعتها ….
مين ف القاعه يشتريها؟
هدى الاضاءات الفرحانه هدى التك و هدى الدم
كرر تانى بسرعه سؤاله …
مين ف القاعه يشترى ام ؟
كانت الدهشه والاستغراب
دايره تلف على الاحباب
كان ف القاعه الصمت التام
ومحدش كان لاقى كلام
ومحدش كان لاقى ردود…
كات عينه ساعتها ماليها
دموع رد وكان صوته موجوع
طبعا ولا واحد م الموجود
بعد ما كرر تانى وتالت
ملقاش اى ردود اتقالت
ومفيش حد عشانها اهتم
بالنسبه لهم كانت هم
كانت عينه بتشغى الام
كان تعبان مش لاقى كلام
بص لامه و دير وشه
ايوه حبيبته كات بتغشه
فبص لعينها ولفستانها
قرر ينطق ينسى مكانها
ويسيب فرحه وحب حياته …
رمى دبلتها اوام ع الارض .. و داس ع الورد
قام واخد ف ايديه اخواته …
خبى ف عينه جروح مش باينه …..
ما هو لو كل الناس هتخون
عمر ما امه هتصبح خاينه
ولاخر عمرها حاباه…
هى معادله حسبه وعادله
مهما تمر سنين وحياه
اللى هيخسر كل الدنيا مقابل امه
هتصبح امه كل الدنيا
فتصبح كل الدنيا معاه
فا وطى اليها وباس رجليها
واستسمحها تمشى معاه .
