كتبت / سلمي عادل..
كتير من الزوجات بتيجي تشتكي من عصبية الزوج وانه سريع الغضب لدرجة انها ممكن تخاف تتكلم معاه او انها بتتجنب النقاش معاه لما يكون متعصب وبتختفى خالص من وشه ساعة النرفزه ..
وتبدأ تحكي المشكله حصلت بينها وبين زوجها وازاي كانت مظلومه وقد ايه هو كان غلطان
وفجأه تلاقى عنيها رغرغت بالدموع وبتعيط وتتنفس بالعافيه
لحد هنا الكلام عادي وبنلاقيه في بيوت كتير بيحصل كل يوم .
طبعا بنهدي الزوجه وبنقولها ان هو وحش و غلطان معلش استحملي شويه
وكمان بنقولها حاولي تتعلمي تختاري الوقت المناسب للكلام
واكيد انتى ذكيه وتقدري تعرفي هو امتي بيكون رايق
وعلشان نقفل علي الموضوع بنبدأ نشتغل على فكرة ان محدش فينا خالى من العيوب وان انتى كمان هتلاقي عندك عيوب هو صابر عليها وانه بيكون مضغوط طول اليوم في شغله علشان مين ؟ اكيد علشانك انتى والولاد.!
ولو انت مستحملتيهوش مين بس هيستحمله ؟؟!!
هنا الزوجه بتبدأ تهدأ وتنفسها بينتظم هي طبعا بدأت تفكر في الكلام وبتقتتنع بيه و بتبدأ تفكر في عيوبها وأن هى كمان ساعات بتزعله وبتبدأ تتأثر وتسأل طيب انا اعمل ايه ؟
وممكن تروح وتصالحه وتتحايل عليه كمان. .
انا كمرشد اسري الزوجه بتستنجد بيا عشان اساعدها المفروض اعمل ايه..
لازم ابقي عارفه كويس ان العصبيه سلوك مكتسب وممكن تكون مرضية انصح الزوجه تقنع الزوج يتكلم معايا لان انا دوري مش مع الزوجات بس ..
نعرف مشكله العصبيه مكتسبه ولا مرضيه وفي كلتا الحالتين بيتعالجوا..
المشكله بقي لو كان الزوج بره البيت لما المدير بيزعقله علي حاجه عملها غلط في الشغل بيبتسم ويقوله معلش يا ريس انا اسف مش هتتكرر تانى وبيتحول لكائن هادي ولطيف..
ولما بيكون له طلب عند حد بيكون لطيف وظريف وبيتحول لدبلوماسي..
و لما بيتعامل مع مدام نهي ومدام فيفي في الشغل بيكون هادى وصوته واطى وبيبتسم وبيقول لوسمحتي وشكرا ..
تخيلي بيكون قد ايه حد رقيق وقد ايه حد جميل .
لدرجه انك لو شوفتيه وهو بيتعامل مع زمايله الستات في الشغل تتمنى انه يكون جوزك .
طبعا ده فيلم اريد خلعا..فعلا ده واقع بيعيش فيه كثير من السيدات ..
النوعيه ديه من المشكلات حرام نتعامل بمبدأ تهدئه النفوس وان الست لازم تيجي علي نفسها وانه مع الوقت والعشرة هيتغير..الجمله اللي خربت بيوت كتير.
لانه للاسف بعد كده فى ستات بتكون زى الحريقه بتولع اى مشكله وبتبدأ تخلط الامور وتفتكر حاجات محوشاها من ايام الخطوبه وتجيب القديم والجديد والدنيا تولع بينهم ..بتتمرد وتنفجر خصوصا لو كانت العصبيه بره البيت قدام الناس..
لذلك بيبقى ضرورى ادرب الزوج علي احترام زوجته ويتعامل بهدوء داخل المنزل وخارجه..وادرب الزوجه علي فن الحوار واختيار الوقت والثقه في نفسها وفي قدرتها لان طبعا كلنا عارفين الزوج بيحب ويقدر جدا الست صاحبه الشخصيه المؤثره..
لو احنا معالجناش المشكله صح وفضلنا نيجي علي الزوجه بس وننسي ان الزواج مؤسسه مشتركه بين راجل وست للاسف لا الزوج هيبطل عصبيه ولا الزوجه هتبطّل شكوي
لان اللى يقدر يتحكم فى عصبيته علشان خايف من المدير او علشان مدام فلانه او علانه متاخدش عنه انطباع وحش او علشان هيلاقى اللى يرد عليه بره البيت ويديله على دماغه ده مش عصبى وانما بيستقوى على الغلبانه اللى في البيت لانها لا هتصد ولا هترد وهتسمع وتسكت ..
زي ما قولت الحل مع الطرفين هو محتاج يتعلم ويفهم ان زوجته لها كرامه وإحساس لازم يعمله الف حساب
وهي لازم تثق في قدراتها وتقدر نفسها عشان يعرفوا يكملوا بعض مش يجيوا علي بعض….
