كلمتين فى حدوتة ع الماشى مع زوزو

بقلم دكتورة زينب زكي

كان يا ما كان با سعد يا اكرام ما يحلى الكلام الابذكر النبى عليه الصلاة والسلام

كان فيه زمان زمان بنوتة جميلة اسمها ريم وكمان كان فيه مامتها تغريد .. 

ايه اللى حصل ؟؟؟؟؟ تعالوا نشوف ..

ريم كانت شطورة وامورة بتجرى وتلعب زى العصفورة وبتسمع كلام مامتها فى كل حاجة الا انها تاكل كويس .. وكانت دايما ترجع بسندوتشاتها كل يوم من غير ما تاكلها وكل يوم ماما تقولها لازم تفطرى علشان تكبرى تقولها بلعب مع اصحابى وبنس اكل وماما تزعل منها وتحذرها دايما من اللى ممكن يجرالها لو استمرت كدا تهمل اكلها ..

وفى يوم من الايام تعبت ريم وماما اخدتها للدكتور اللى قال انها ضعيفة وعندها انيميا ولازم تاخد فيتامينات وحقن كتير علشان تسترد صحتها وخافت ريم من الحقن وفضلت تبكى وتقول اعمل ايه ياربى مش عاوزة حقن .. وبسرعة قررت تتصل ب ماما زوزو تحكيلها على اللى جرالها .. لكن ماما زوزو قالتلها متخافيش .. لو شربتى عصير رمان كل يوم تخلصى من الانيميا بسرعة وتهتمى بالفاكهة وكمان الخضار فيها فيتامينات تخلصك من الحقن .. وافقت ريم وقررت تهتم بأكل الفاكهة والخضار وكمان تشرب عصير الرمان ويوم ورا يوم فاقت ريم ورجعت تجرى وتلعب مع اصحابها لكن المرة دى مع الاهتمام بأكلها خصوصا الفاكهة والخضار وعصير الرمان .. 

وتوتة توتة خلصت الحدوتة .. حلوة ولا ..

تحياتى للجميع 

ماما زوزو