بريد القراء أعداد: هويدا صابر
للأسف ستات وبنات كتير في مجتمعنا بتعاني من أكتئاب أو عقد نفسيه ومبتتكلمش ولا حد حاسس بيها ، بسبب الضغوط الشديده أللي بتتعرضلها سواء في البيت أو المدرسه أو الشغل أو الشارع أوالرجل ومعاملته السيئة ليها سواء كان أب أو أخ أو زوج أو أبن أو متحرش ممكن يقابلها في شغلها أو في الشارع أو جارها ويمكن الرجل السبب الرئيسي في دا ، دا غير الأستهزاء والتقليل من كل حاجه بتعملها سواء كان فى شغلها أو في بيتها وطبعا في بيوت كتيره مبدأها في التربيه تعنيف البنت عشان دا في مصلحتها وعشان متجيبش العار لأهلها ولازم يجوزوها بسرعه وفي مثل كنت قريته “دلال البنت يخزيك ، ودلال الولد يغنيك”..
وبصراحه رغم أننا في 2017 في بنات وستات كتير علي خلق وثقافه ومازال فيهم الضعف في مواجهة الكتير من مشاكلهم ، أو تفكيرهم كل أللي مسيطر عليه أمتي أتجوز عشان أبقي زي فلانه وفلانه وبتعيش في دور مكسورة الجناح وضل رجل ولا ضل حيطه ، أو تفكير رجعي وغريب زي البنت أللي تبلغ عن متحرش المفجأه أن الأنتقادات أللي هتتوجه ليها هتكون من بنات زيها ، أحنا في وقت وفي زمن لازم البنت تكون فيه رجل وبنت في نفس الوقت وتعتمد علي نفسها وتتعلم تاخد حقها أنتي لا ضعيفه ولا مكسورة الجناح ، ولا المفروض تحطي أيدك علي خدك لحد ميجي أبن الحلال أللي هيستتك ، ولا تسكتي علي أي عنف من أي نوع ولا تسمحي لحد يحط أيده عليكي برضاكي بأسم الحب أللي بيحبك هيخبط علي بابك أللي بيحبك مش هيتحجج بظروف ويأجل كان فين ظروفه لما قرر يعلقك بيه بكلمة بحبك ولا الظروف ظهرت وقت الجد أو ولا تسكتي علي متحرش مد أيده عليكي ولما تشوفي بنت بلغت أدعميها ، ذاكري وأنجحي وأشتغلي وأثبتي نفسك وأهتمي بيها وشيلي من تفكيرك أنا بنت ماليش غير بيتي في الأخر ورجلي ، لأن التفكير دا بيخليكي معميه وقت أختيارك أهو عريس والسلام أحسن معنس ، والنتيجه حياه بتكوني فيها شبه ميته وأولاد بيدفعوا التمن ، وكل أب وأم لازم يفهموا أنك مش أخرك بيت جوزك ويربوا دا جواكي ، لازم ياخدوا بناتهم في حضنهم الحضن دا طوق النجاه وحصن للبنت ويربوا بناتهم علي النقاش ويعلموهم أزاي يعبروا عن رأيهم ويعتمدوا علي نفسهم وأزاي تجيب حقها ومتسكوتش عليه ، يربوها علي أنها ملكه مش شئ عايزين يخلصوا منه في أقرب وقت ، بأمانه أحنا محتاجين وقفه وأعادة نظر وحسابات.
