بريد القراء أعداد : هويدا صابر.
يقول الله تعالى في كتابة العزيز ، بسم الله الرحمن الرحيم ( لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا) فعلا أيه جميله ومريحه للنفس ، ياترا كام مره باكينا وحزنا علي فقدان شئ في حياتنا وكنا بنطلبه من ربنا وبفقدانه أفتكرنا أن كده خلاص نهاية الدنيا وأن الحياه مستحيله وكأن خزاين ربنا خلصت أو منع كرمه وعطائه عننا ، لعل بعد الفراق تأتي السعادة والهناء وراحة بال ، لعل بعد الطلاق يأتي زوج أو زوجه أصلح وأحسن ، ولعل الأيام القادمة تحمل كل الخير والسعادة والأمال ، محدش عارف بكره مخبي أيه ربنا وحده العالم وربنا وحده أللي بأيده الخير وكل شئ سبحان الله وحده القادر يجبرك ويعوضك ويعطيك في أي وقت علي طريقته ، بس أنت أرضي وأصبر وهتتعجب من كرمه وعوضه ليك دا في الصبر دوا وأجر وفي الرضا حب الله ليك ، ومتقولش الوقت فات هيعوضني أزاي ، ربنا مبيخدش شئ ألا عوضك عنه ، تعالوا نشوف قصة ن س وأحنا نعرف …؟
————-
أنا دكتورة أسنان عندي دلوقتي 52 سنه ، أنا متابعه بريد القراء من مده علي صفحة مجلة سحر الحياه وعجبني جدا مشكلة (لا فاقد الشئ يعطيه ومش قد الشيله متشيلش و مبروك جالك ولد وأني رزقت حبها كانت رائعه ولعبة الشيطان ودي دمرتني بجد نفسيا) قصص كتير ومختلفه كل واحده فيهم هتكون شبه قصة حد فينا ، عشان كده أنا أستأذنت زوجي ووافق أني أشارك وأحكيلكم تجربتي وتعرضوها في بريد القراء وتكون جزء منه وتسيبوا التعليق للقراء.
أنا أتجوزت من أبن عمي ، وعيشنا مع بعض 7 سنين ، وكان في مشكله عندي منعتني من الأنجاب ، وأستعنت بعد ربنا بأطباء كتير وعملت أكتر من محاوله لكن أرادة الله فوق كل شئ ، أتكلمت مع زوجي أكتر من مره أننا ننفصل ويتجوز ويخلف كان بيرفض ويقولي أنتي بتقولي أيه أحنا مع بعض علي الحلوه والمره ، لحد متفجأت أنه متجوز ومخلف من 4 سنين ومن صديقة عمري أللي قطعت علاقتها بيه فجأه وأختفت حاجه ولا الأفلام ، وقتها أفتكرت لما كان بيقولي كبري دماغك وأنسي أنا نسيت ، عيال أيه وهم أيه أنتي عندي بالدنيا كلها ، وأفتكرت بخله عليه وأنه قد أيه كان معتمد علي فلوس عمه بابا الله يرحمه وكنت بعدي وبقول أبن عمي وبحبه وأللي نعرفه أحسن من أللي منعرفوش وحفظت غيبته رغم المشاكل أللي بينا ، أصريت وطلبت الطلاق وكان في جزء من العيله معترض وبيتوسط بينا أننا نرجع لبعض لحد متم الطلاق بعد تنازلي عن كل حاجه وركزت في شغلي وفي نفسي أكتر وعدت الأيام عليه بمنتهي الهدوء والسلام ، لحد متعرفت علي دكتور زميلي جديد أكبر مني ب 5 سنين عرفت أنه أتجوز مرتين وأنفصل وعنده مشكله منعته من الأنجاب وحالته مفيش فيها أمل ، زمايلنا كلموه وكلموني أننا ظروفنا شبه بعض وأيه المانع من أنكم ترتبطوا ، وبالفعل أتجوزنا هو أنسان جميل جدا ومحترم وكريم لأبعد درجه وبيحبني وأنا حبيته جدا وحسيت أنه نعمه وعوض من ربنا ، بنشارك بعض في كل شئ وتفكيرنا واحد ، بعد جوازنا ب 6 سنين حصلت حادثه عربيه بشعه لأخو جوزي ومراته وللأسف ماتوا فيها ربنا يرحمهم ويغفرلهم وأخوه دا كان مش مجرد أخ دا كان صديق ليه وروحهم في بعض والموضوع دا كان صدمه لزوجي سبحان من صبره وقواه لحظتها ، وسابوا ولد وبنت توأم عمرهم كان سنتين وقتها مالهومش حد في القاهره غير جوزي عمهم وحمايه وحماتي وهما كبار في السن وجدهم وجدتهم لأمهم كبار في السن بردوا ومش قد مسؤلية أطفال في السن دا ، جابهم جوزي معاه البيت بعد ما خالتهم سافرت كانوا معاها من بعد الوفاه في بيت جدهم لأمهم هي متجوزه ومخلفه وعايشه في البحر الأحمر عشان شغل جوزها وبتنزل القاهره كل 20يوم ، أنا أول مشوفتهم وهو داخل بيهم عليه أنهرت وقولتله دول أولادي أللي مخلفتهمش وعوض ربنا ليه هيكونوا في عنيه لو ليه خاطر عندك نربيهم سوا ، باس راسي وقالي أنتي شيلتي عني حمل كبير أنا كنت هقولك نربيهم لأنهم مالهومش غيرنا بعد ربنا ، أنتي بنت ناس وبنت أصول وعارف أنك هتراعي ربنا فيهم ، سيبت شغلي وأتفرغت لتربيتهم ولزوجي عشان ميحسش بأي تقصير مني لأنهم أكيد مسؤليه ومحتاجين رعايه وأهتمام وبما أنهم هديه من ربنا وعوض لينا أحنا الأتنين يبقي لازم نراعي ربنا فيهم كويس ، وعلي قد حبنا ليهم هيتردلنا الحب دا أضعافه ، لأن الأطفال كل حب ليهم وكل شئ زرعتيه جواهم هتحصديه حب وخير بعدين ، الحمد لله رب العالمين ربنا مفيش أكرم ولا أحن منه عليه وعلي جوزي أنه عوضنا بيهم وهيكونوا أولادنا وقرة عينا وعلي الأطفال دول أنه عوضهم بينا بدل أبوهم وأمهم يعني أحنا الأربعه عوض لبعض الحمد لله حتي يبلغ الحمد منتهاه.
———————-
هختم بمقولتين عجبوني (ثم يعوضك الله وكأنك لم تخسر شئ) و (تحزن عندمآ تفقد شيء تعتبره ثمين ، ولكن عندمآ يعوضك آلله بشيء إجمل منه بمراحل ستدرك بأن آلخيره فيمآ إختآره آلله).
تم نشر تجربتك وهنسيب التعليق للقراء بناء علي طلبك ، لكن لازم أحيكي علي جمالك وأحترامك لنفسك وحفاظك عليها وصبرك أنتي تستحقي كل خير وعوض من رب العالمين ، وأحلي ختام قولتيه أنكم عوض لبعض ، ربنا يلهمنا جميعا الصبر والأحتساب ويعوضنا عن كل فقد وحرمان ويسعدنا حتي تبلغ سعادتنا عنان السماء أمين يااااارب العالمين.
