رساله من امراه
بقلم / داليا طه
وحشتنا المريله
مع اول ايام الدراسه واولادنا بيحضروا لبسهم الجديد سرحت معاهم ايام زمان واول ايام دراسه لينا وتحضير الجيبه الزرقا والقميص الابيض والكرافت الازرق والشوز الاسود او الابيض والتوك اللى ممنوع فيها الزركشه والدلع توك ساده بيضا والشربات البيضا ام دانتيل وورد ستان وبعد قصه شعرنا الاسد والطاوس واللاجرسون حنرجع نلم شعورنا علشان ممنوع نتانتك بشعورنا لازم شعرنا يرجع لورا ياضفيره يا ديل حصان او المحجبات منا لابسين الايشارب الابيض يااااه والسنه دى مش حنمسك الشنطه الكبيره لا حنمسك شنطه مختلفه لاننا كبرنا بقي على اد ماكنا بنتمنى اد ايه نكبر ويكون عندنا حريه في اللبس ونروح ونيجي ومانعملش حاجه غير نتفسح الا ماكبرنا اتمنينا نرجع تانى ونسمع كلام مدرسينا وحشنا الديسك وجرس الفسحه اللى كنا من اول مانروح عايزين نسمعه علشان نجمع مع بعض انا واصحابي اللى في فصول تانيه وساعات بنعمل وليمه كل بيظهر مالذ وطاب من عمايل ست الكل امهاتنا ونرجع نتمنى نسمع جرس المرواح علشان نركب الباص ونرجع على بيوتنا ونحكى كل شويه حصل ايه والاستاذ ده قالنا ايه والاستاذه ديه وانى مدرس بنحبه ومين اللى مش بنحب حصته ونفضل نقلدهم في تصرفاتهم والطابور وتحيه العلم ياااه كانت ايام جميله لو كل طالب عرف اد ايه ان اهله نفسهم يرجعوا تانى مايتمنوش يكبروا ويفضلوا يتعلموا ويسمعوا نصايح مدرسينهم واهالهم حيعرفوا مايستعحلوش انهم يكبروا
رحم الله من علمونا اذا كانوا احياء واموات
رئيس قسم هو وهى : داليا طه
