احنا بنتعب أوي عشان نفرح

بقلم: أمنية شكر
احنا بنتعب أوي عشان نفرح

احنا في مجتمع ………. 

اتعودنا على معاملة الموظفين الحكوميين وخصوصا في شئون الطلبة ، وكأن أسلوبهم ده شيء عادي ، كمان عشان نخفف على نفسنا خدنا الموضوع سخرية وتريند على فيس وتويتر احسن ما يحصلنا حاجة، مع ان الكتير مننا كذا مرة يروح معيط ، يابسبب أسلوبهم يابسبب غباء سير العمل وأنهم بيشيلوكي شغلهم هما .. والحقيقة أن الموضوع متروك للأشخاص كل حسب ضميره وأخلاقه ، زي النماذج الغبية اللي بنقابلها ، فيه نماذج جميلة ، ودي مش إيجابية بالمناسبة ، لان مش مهم الشخص ، فين اللوائح اللي تنظم علاقتنا ببعض ، وازاي انا كمواطن احافظ على حقي اللي بيبدأ  بالاحترام . هنا بقى اقدر اقول ده مش مجتمع مسلم ده مجتمع مقرف جدا . 

لحد كده واللي جاي أسوأ وأوجع !!! اللي محدش يتخيله والاسوأ انك تتعامل كده في مستشفى علاج الأورام !! عزيزي المواطن روح موت انت وأهلك .

 ده بس مش غباء في الإجراءات ، لا وكمان والتعامل لا وكمان قلة الادوات والأدوية ، لا وكمان قلة نظافة المكان والخ الخ ، ملائكة الرحمة بيتخانقوا كل يوم مع المرضى وذويهم ، وأيوة حضرتك ، المريض بيتشتم عادي وكل يوم ، أوضة الكيماوي أو زي ما بيسموها أوضة التنفيذ !! اللي بيبقى فيها اكتر من عشر مرضى علي الاقل ، هما وأهلهم بيدعوا على كل مسئول في البلد من أول رئيس الجمهورية لحد الممرضة والعامل . اكيد ربنا سامعهم

 أحد المسئولين الكبار في المستشفى نزلت ع الفيس من فترة أن محافظ المنوفية هيخصص تليفونات للشكاوى من القطاع الطبي ، معلقة عليه ” مش هيبطل رن ) هي الدكتورة بتضحك وتهزر ، لكن الحقيقة الموضوع ميضحكش الموضوع بيوجع !! 

عزيزي المواطن عشان تاخد حقك لازم تتخانق ! شفت مواطنة مش راضيين يدوها جرعة الكيماوي بسبب غلطة ما في الورق هما السبب فيها وبعد ما بنت المواطنة دي داخت العشر دوخات مش السبعة بس ، ومفيش فايدة ، اتخانقت وعلت صوتها ودقايق وأدوا لوالدتها الجرعة  …

 ياعزيزتي انا مش عايزة اتخانق ومش حابه لكن مضطرة !! 

وده بيحصل كل يوم !!!!

تكشيرة الدكتورة 

دي لوحدها مأساة ، ياجماعة ابقوا ربوا عيالكوا قبل ما تعلموهم ، هما المرضى هيستحملوا الوجع وهيستحملوا فوقه اسلوبهم وقلة ذوقهم !!!!؟

الحقيقة كل حاجة في مصر بتخلينا نضحك بالعافية ، بنزق حاجات كتير جوانا عشان نبتسم ، بنعمل مجهود كبير اوي عشان نبقى سعداء ، لان السعادة هنا اختيار وقرار ، مش منحة ولا وجودها عادي وطبيعي 

، احنا بنتعب اوي عشان نفرح !!!!