ثروت بديع
ضمن وثيقة الغضب المشروط
رصوا بنود
وضعوا شروط
مسموح أطلـُب
مسموح أغضَب
مسموح أصرُخ
أصرخ لكن
وآه من لكن !!!
آه م المعنى الممطوط
يعنى…إذا ..حتى..لو
حتى لو جريح ومعذب
عند كلامى للعليوى
الساكنين فوق
لازم
لازم أراعى أّصول الذوق
وأبقى مهذب
………………
البند ألأول
ممكن أطلـُب
أطلـُب لكن
لازم أتدرب
أروح الجمْ ألف الملعب
لغاية ماأتعب
آجى قدامهم محنى الضهر
ولو مش خايف
أعمل فيها دور الأحدب
أطلـُب ماشى
لكن لازم
عند كلامى للباب العالى
اعدّلْ حالى
أبين رعبى أرعش ركبى
أبقى مؤدب
……………..
البند التانى
ممكن أغضَب
لكن لازم
الأول أهذب أخلاقى
أغضَب لكن
الغضب الراقى
أدهن وشى بمرهم خوفى
يعنى اتلعثم
يعنى أتلخفن
أشكى ظروفى
اقوله سيادك
لألأ … قصدى جلالتك
لأ يا افندم…. قصدى ياباشا
لأ مولانا …لأ نيافاتك
والله ماعارفك
لكن عمرى ما أنسى مخافتك
أسف يعنى غضبت شوية
لأ لأ لأ زعلت شوية
أصلى مغفل
لكن وعد المرة الجاية
ماتعود تحصل
خلاص هاأتعلم
أرتب غضبى وأبقى منظم
……….
البند الثالث
إذا
جاتنى فكره أتجنن وأصرخ
أصرخ ماشى
أصرخ لكن
لكن فى حدود المسموح
ممكن أقول ممكن أبوح
أصرخ همس
أصرخ بالرتم المبحوح
ممنوع أصرخ تحت الشمس
أصرخ لكن
مايسمع غيرى
يرد صراخى جوه ضميرى
أصرخ ليّ
أصرخ للذكرى المنسيه
ويبقى نواحى مجرد فكرة
يبقى صراخى هادى مرتب
………………..
ملعون ياصراخنا المشروط
ملعون يالساننا المربوط
ملعون ياحدود المسموح
ملعون ياغضبنا
ملعونة أفكارنا
لو ماتحيى فينا مغامرة
يعلا الصوت
تحلى النبرة
يخرج الغضب المكبوت
تطلق صرخة
ترد جوه بدننا الروح
مدير قسم الادب والشعر
علا السنجري
