الشخصية المرعبة فى كلمتين .. وبس
بقلم دكتورة زينب زكى
هل تعرفون شيئا عن الشخصية المرعبة؟؟؟!!!!
من الشخصيات المرعبه جدًا شخصية بنت مبتشتكيش , مبتفضفضش , مبتقولش أنا تعبانة أنا بعاني وفي قلبي مأساة وحزن خامل بتخرجة لأي شخص قريب منها , مبتروحش لشخص متعرفوش وتقول أحكي له عن أوجاعي وألامي عشان أرتاح , رغم كده عندها القدرة إنها تسمع لأي شخص وتعرف سبب كربه وتخفف من عليه بطريقة مبهجه جدًا !
كُل مرّة هتبصلها فيها هتلقيها بتضحك , بتهزر وإفيهات وكلام كتير هتلاقيها بتقوله وهتلاقي نفسك فيه بصورة جميلة , إللي حوليها واخدين الفكرة عنها إنها معندهاش مشاكل وتفاصيل حياتها مترتبه , مرتاحه ماديًا , وماشيه في تعلمها بدون ما تشتكي , واخدين إن حياتها كلها ضحك وكفي !
والحقيقه إللي قليل إن شخص يكون عارفها عنها غير أقرب شخص ليها غالبًا بيكون أقرب صاحبه ليها ولو مش موجودة يبقي هتفضل معانتها موجودة في أوضتها , نوبات البكاء إللي بتوصل بيها أحيانًا إنها مبتقدرش تاخد نفسها بتوصل بيها إنها بتسمع صوت قلبها إللي هيخرج منها أو هيتوقف جواها , بتنهار وكأن بركان بيفور حمم من التراكمات بتوصل بيها لحد إنها عايزة تصرخ لحد ما تفقد وعيها , وبعد ما تنتهي المعركة الداخليه دى , ترجع للمزيكا المفضله ليها وقهوتها , وتمارس يومها المعتاد بنفس القناع المبتسم إللي ورا ندبات وجروح في روحها ومحدش يعرف عنها غير إنها أجمل إنسانه يعرفها ..
