شعر
عنتر هلال
آخر رساله منك….. الى عبد العزيز بغدادى….
أنا جى فى طيارة بكره..
انا جايلك جثه…
انا جى بدعوك على حفلة..اول ليالى
الذكرى..
وآخر وداع المغادر .
فى المطار أستقبلنى..
بعد أما اشوفك..سبلنى
سلم عليه…..وسلمنى….لطول ليل المقابر.
النهايه كات جوايا
حبيتها بيكم دنيايا
سامحنى مش جى بهدايا.
انا كنت تعبان عالآخر..
لم الضحك
والوجع
والضنك
والوحده والحلم والعيا والتضحيات..
لملم معايا الحاجات..
سلم.. أمانه.. الدفاتر..
للمدام والبنت..
انا مت
ياعناتر..
تخيل ..
أنا مت.
مع إنى ضحكت وفوت..
من بين خناجر..
الأطبا…
وسكنت زى الطيب
فى هدوم الأحبه..
فى الحضن والترحيب..
انا الل سافر..
طاهر
رغم المساخر
لحد المشيب..
انا اللى حاسب على المشاريب
اموت غريب
وحيد
ياشاعر.
انا مت ياعناتر
تخيل
استغفر الله العظيم.
انا
مت.
مدير قسم الادب والشعر
علا السنجري
