* 
بقلم :نسرين محمد
معظم جيلنا اتربي بشكل نمطى ، نظام القالب الواحد الي هو الشده والصرامه ، واحيانا التوبيخ والنقد الجارح ، وده مش عيب في آباءنا وامهاتنا ده إلي كان واصلهم ساعتها ، وكان أحسن حاجه ممكن تتقدم في التربيه في الوقت ده ، طلعوا دكاترة ومهندسين ومدرسين ، بس قل ما وجدنا مبدعين فنانين بجد ، بسبب اسلوب النقد والنمطيه في التربيه والقالب الي الاطفال كانت محطوطه فيه ، تفتكرو نكمل كده نكمل نفس المسيرة ونقتل الإبداع والمواهب في أطفالنا ، ولا نصحح مسارتنا ونداوى اوجعانا ، ونتعلم نربي صح نتعلم نروى ازهارنا من فيض مشاعرنا ، ونراعيهم بصبر وحنيه هما يستحقوها .
علشان كده هبتدى معاكم سلسله زهور ، علشان نعين بعض علي التربيه الي تطلع جيل سوى جيل مبدع جيل عارف هو عاوز ايه ، همشي معاكم ومع نفسي خطوة خطوة هسمع آراؤكم وافكاركم ، ونتناقش في اهدفنا وخططنا علشان نحقق الحلم ده .
أول خطوة لازم نتعلمها ونشتغل عليها انهارده ( الاعتراف والتصالح مع النفس) .
ايوه أيها الاب الفاضل وحبيبتي الام ، لازم نداوى جراحنا النفسيه الأول ونعترف انها موجوده ، علشان نقدر نتفاداها مع حبات قلوبنا لازم نتعلم نحب نفسنا ونطبطب عليها ونجمع شتتها ، ولو مقدرناش لوحدنا نلجاء لحد مختص وفاهم كويس وفي الأول وفي الآخر الدعاء ، واللجوء لرب السماء فهو خير هادى وخير معين .
لو ارتاحنا ونضفنا جروح قديمه حنطيب واﻵﻵمنا بالتدريج هتقل ، وتتنسي حتعرف تركز في هدفك وفي النعمه الي ربنا انعم عليك بيها ، وقر عيونك بوجودها (اطفالنا ) ، هتعرف تربي صح وبجد وتستمتع وانت بتربي يلا نبدء الطريق سوا ، أيدينا في ايد بعض ويااارب تبقا بدايه لجيل مختلف ، جيل يعرف يعبر عن احتياجاته النفسيه ، جيل يعرف يقول (لا) جيل يعرف ياخد حقه ، وميجورش علي حقوق الغير جيل مبدع جيل فنان .
دمتم سعداء.
رئيس قسم هو وهي : داليا طه
