عزيز موسى
………..
جوايا غنوة بتتكتب
رغم الأسى ب حروف أمل
م بتنتهيش
جوايا جرح بيرمى بذرة
ف أرض روحى عشان يعيش
والقصيدة
بتبتدى ف الأصل كافرة
كل كلمة فيها تعبت م المعافرة
وإنت رغم أنك بدايتى بتنكرينى
كأنى نبت شيطانى دايماً ترفضينى
ومش بلومك
رغم الوجع ما زلت ببدأ
رحلة العمر اللى فاضل
جوة يومك
لسه شايفك
جوة عين البنت اللى تعبت ف انتظارى
بين هيامى وخوفى منها
ولهفتى كل اما اشوفها
وكام محاولة بتبقى فاشلة
لأنى مش عارف ادارى
لسه حضنى بيلمسك
لما شمسك تضوى
بعد الفجر ف جبينى
لسه طعم الملح جوة حلق روحى
وإنت غصب عنى بتفطمينى
بترسم على شط نيلك
حلم يائس م الحقيقه
اشمعنى إنت
الموت على كف ايدك
لسه ليه مليون طريقه
مسكتانى عن الهتاف وسط الجموع
يا حبيبتى
تحيى إنت
ويحيا حبك يكوى قلبى والضلوع
يا حبيبتي
يحيا حبك
رغم إن الخطوة مش ضامنه الرجوع. .
مدير قسم الادب والشعر
علا السنجري
