بقلم . روان ممدوح عبد الجواد منير
لو شفت حد قاعد لوحده وساكت ياريت ماتسيبهوش . عشان انت مش عارف هو ساكت ليه او ايه شاغله وبيفكر فيه . وايه اللي موقفه ومخليه بعيد . ليه بيخبي ?
حاول تقرب منه وتطمنه . حاول تفهمه
اوقات كل اللي بنحتاجه انه احنا بس نطمن او نحس بامان . لمجرد انه فيه حد جنبنا بيسمع وبيفهم
كفايه انه بيهتم . كفايه انه انشغل باللي شاغلنا
كفايه انه شافنا مجروحين وموقفش ساكت
دايما بنتسأل مالكم . والاجابه واحدة مافيش
يمكن بنقول مافيش عشان عارفين انه مهما اتكلمنا محدش هيفهمنا ف بنسكت ونسيب العيون تتكلم
علي فكرة العيون اه بتتكلم .لكن مش كل الناس بتعرف تفهم لغتها .
اوقات بيعجز اللسان عن الوصف ف بيسكت وبيسيب الدموع تتكلم ومع ذلك الناس عمرها مافهمت .
فيه كلام كتير اوي صعب يتوصف ولكن الاصعب انك لو وصفته يتفهم غلط . وعشان كدة بتقعد لوحدك ومتحتاجش حد جنبك
اصل فيه فرق كبير اوي بين حد جنبك عشان هو عايز يكون جنبك وحد جنبك عشان مش لاقي غيرك
ودة اللي ناس كتير اوي بتنخدع فيه واوقات كتير بنوصل لمرحله اليأس بسبب احساس الوحدة اللي مبينتهيش مع انه احيانا الوحدة بتكون احن من ناس كتير .
اصل الساكت عمره ما هيتكلم طول ماهو مافيش حد بيفهمه واللي بيتكلم عمره ما هيسكت الا لما يحس انه السكوت احسن بكتير.
الحاجة الوحيدة اللي نفسي كلنا نفهمها
انه ربنا محطش حد فوق حد كل واحد فينا جواه حاجة حلوة . حاجة بتميزه عن غيره . فمتسكتش .عبر واتكلم حاول تاني ومتستسلمش
ممكن كل الكلام اللي بنقوله يبقي نقطه في بحر من اللي جوانا . بس كفايه انك تكون شايل جواك بحر وساكت . مش ممكن تكون دي لوحدها ميزة غيرك ميقدرش يعملها
كفايه انك بتعافر كل يوم عشان تبتسم حتي لو مش قادر . دي ميزة
انك تكون شايل جبال وكل اللي بتظهره صخور دي ميزة
انت في حد ذاتك ميزة
