مقالات وحكايات ماما زوزو فريدة

بقلم دكتورة زينب زكى

أخبروا حزنكم أنه ما هو إلا ضيف ثقيل وسيمضي مسرعاً بإذن الله

فيوماً ما في مكان ما سيأتي الفرح إلي قلوبكم البريئة ..

كان يا ما كان يا سعد يا اكرام ما يحلى الكلام إلا بذكر النبى عليه الصلاة والسلام ..

كان فيه زمان زمان بنوتة جميلة عايشة وحيدة واسمها فريدة ايه اللى حصل ؟ تعالوا نشوف ..

فريدة كانت حزينة ووحيدة رغم ان حواليها ناس كتير وكان دايماً رأيها فى نفسها انها مالهاش لازمة فى حياة اللى حواليها زى قلم الألوان الابيض اللى مينفعش تكتب بيه ولا ترسم بيه على الورق

وفى يوم من الأيام قابلت بنوتة جميلة حاولت تكلمها وتصاحبها لكن فريدة كانت دايماً متحفظة وشايفة انها متنفعش تكون صديقة لحد ولا ينفع تقرب من حد .. لكن البنوتة الجميلة أصرت تصاحبها وسألتها انتى ليه بتعملى كدا ومش عاوزة نكون اصدقاء .. بكت فريدة وقالت انها مالهاش لازمة زى قلم الألوان الأبيض ومش هفيدك بحاجة .. لكن البنوتة الجميلة قالتلها ازاى بقى والقلم الأبيض مهم جداً وواضح جداً بس لو رسمنا بيه على ورقة سودا .. قالتلها انتى مهمة جداً واسم على مسمى فريدة وانتى فريدة غير كل الناس اللى حواليكى .. واضحة ومميزة فى عالم اسود .. انتى بس زى م ربنا خلقك بتركيبتك دي .. هو برضه خلق حد مش بس يقدر يتعايش معاك .. لأ دا هيعشق كل تفاصيلك الصغيرة .. ساعات الواحد بيكون حواليه الدنيا كلها ومع ذلك بيهرب منها لإحساس بالعجز والفشل جواه .. إنسان وصل لدرجة من اليأس أنه مش عارف يحب نفسه ومش شايفها تستاهل تتحب

والاصعب من كدا إن أغلب الناس هيقولوا له أنه مش هيلاقي حد يحبه غير لو هو حب نفسه الأول واتصالح معاها

بس ليه؟!!

ما يمكن أنت محتاج حد يصالحك على نفسك .. محتاج تشوف نفسك بعيون حد بيحبك .. يمكن تعرف ترجع تحب نفسك تاني .. محتاج شخص واحد بس يفهم احتياجك ويأمن بيك وبقدراتك اللي أنت نفسك مش مدركها .. محتاج بس شوية نور يظهروا الجمال اللي العتمة مخبياه ..

سمعت فريدة الكلام دا وعيونها بكت مش عارفة حزن ولا سعادة مش عارفة تضحك ولا تعمل ايه اتلخبطت .. لكن البنوتة الجميلة قالتلها افتحى قلبك للدنيا .. فمهما طال الليل لابد من طلوع الفجر ..

وتوتة توتة .. خلصت الحدوتة

تحياتى للجميع

ماما زوزو