بقلم هبه العسقلاني
مستشاره تربويه ولايف كوتش.
فكرت مره لو قربت اوى وبصيت في الشمس وفتحت عنيك اوى ليها هيحصلك ايه؟؟ ،،، هتتالم ،، هتدور وشك الناحيه التانيه وتبعد عنها ،، والفكره اللي هتتكون في عقلك عن الشمس انها وحشه ومضره وأنك مش بتحبها وأنك بتفضل الغيوم او عتمه الليل اكتر ،، وممكن كمان تكون فلسفتك الخاصه عن ليه الشمس وحشه والعتمه احسن وهكذا ،،،، وعلي الرغم ان فايده الشمس وجمالها واهميتها باينه للجميع ولكن ستظن انك جبت التايهه وأنك عرفت اللي محدش عرفه وأنك أذكي من الكل وأنك مختلف لأنك جبت قرار الشمس وعرفت اخرها .
الحقيقه ان المشكله مش في الشمس خالص ولا المشكله في حضرتك ،،، المشكله في القرب ،،، القرب اللي انت قربته من الشمس ،،، ولان للقرب اداب لازم تبقي عارفها وانت بتقرب،،، لازم تبقي عارف انك لما هتقرب العيوب هتزيد اووى في عنيك ،، واحتمال حتي المميزات مع القرب من كترها وشدتها تخنقك وتزهق منها ،،، وساعتها هتحكم علي الشمس انها وحشه ومقرفه وان الضلمه احسن……..
وهكذا الحال اعزائي كمان مع البشر ،،، كفايه احكام علي نفسنا وعلي الناس ،،، كفايه كره ورفض لأقرب الناس لينا ،،، صدقوني كلنا عيوب ومميزات في نفس الوقت ،،، حتي الحاجات ،، الأماكن ،،، الوظائف ،،، كل شي حواليك ليه عيوبه وليه مميزاته ،،، مسافة قربك منه هي اللي بتحدد حجم العيوب وشده المميزات ،،، لما تقرب قرب بأدب ،،، قرب من غير احكام تأذي بيها حبايبك ،،، ولو مش قادر وغصب عنك ماشي تطلق الأحكام علي طول الطريق ،،، يبقي ابعد شويه وبص من بعيد ساعتها هتشوف جمال الشمس وفايدتها ومش هيضرك اوى عيبها ولا هتزهقك مميزاتها.
كلنا علي الطريق ماشين نتعلم وانا اولكم
درس اتعلمته بعد ما خسرت ناس كتير.
دمتم بنوره مستيقظين.
.
