كتبت : داليا طه
عارف أما تكون عايز تمارس حياتك ، كده من غير قلاقيع ولا تعقيدات ، تتحرك ببساطه تتكلم ببساطه ولايفرق معاك الناس اللى بتفصص الكلام ، ويحبوا ياخدوا الكلام بأكثر من مفهوم ، الناس اللى حاسبين كل حاجه بالورقه والقلم ، ماينفعش حاجه تعدي عليهم كده ، لا حاسبين حياتهم نفسهم كلامهم تعاملاتهم حتى احتياجاتهم حسبتها .
على رأي المثل أخدين على صدرهم اوى ، لو جنيه نقص يفرق معاهم وممكن تتازم ، لو معرفوش يزودوا مدخراتهم أكتر يضايقوا ، لو محصلوش على حاجه كانوا طلبينها او بيتمنوها في الوقت واللحظه يتذمروا وكأن الدنيا اتهديت.
علشان كده كترت أمراض المجتمع وبقي في صراع ، وياريت صراع حقيقي صراع من أجل البريستيج والمستوي ، والأفضل والاحسن والأهم ، وطبعا في توازي مابين الصراع من أجل الاقوي وصراع من أجل المرض .
كم الأمراض اللى تسمع عنها غريب وأشكال وأنواع واللى بيجي هنا بيروح هناك ، ماهى دايره ومستمر .
لكن لو فكرتوا في لحظات انحنا ناخد كل حاجه ببساطه، وهدوء وبلاش التوتر العصبي ، وأن اكيد كل وقت وليه آذان ، ربنا مقسم رزقنا ومهما وصلنا من شكليات، مش حنقدر ناخدها في بيتنا متر × متر ، ماكل واحد ليه ٢٤ قيراط، ومهما حاولنا حناخد رزقنا من الحياه والزواج والحب والاولاد والأموال بمقادير ، مين قدرها سبحانه وتعالى .
ناس تفكر تبنى لابنها بيت وتجبله عربيه وتجبله زوجه وتصرف عليه لكن تيجى عند التربيه عادي ماتفرقش، أهم حاجه الامكانيات ، طب تعالى بقي امكانياتك دي فيدتها إيه لو ابنك مااقدركش ولا حاجه ، عملت لابنك فلوس ودنيا لكن عملت لابنك دين وآخره ودعوه ليك وأنت اتقطعت اعمالك.
ناس كتير ندمت انها استخدمت البساطه في الاخلاق و التربيه والدين ، والشده في جمع الفلوس والمقارنة والتحدي و المدخرات .
الحياه بسيطه جدا والاسهل أننا نعيشها وإحنا متأكدين وراضيين تماما إن ربنا حيباركلنا في كل شئ ، عامل نفسك ببساطه لأنك أنت اللى حتتعب وتمرض، عامل ولادك ببساطه اتقرب منهم وحبهم زى ماهما ماتخليش حبك مشروط ، حب زوجتك وعاملها بكل بساطه وطبطب عليها ده ربنا قال موده ورحمه ، عامل اهلك وجيرانك ده ربنا ورسوله وصوك عليهم، ومافيش مشكله اما تتصل ولاتزور مش حيقولوا رامى نفسك علينا ، ماتخليش فلوسك للمدخرات وتكوم حاجه على حاجه ، عيش واتبسط وابسط اللى حواليك وتصدق وادخر، لا هو حرام ولاعيب سيبها على اللى خلقك فربك اسمه الباسط .
رئيس قسم هو وهي: داليا طه
