“الإعلامية مشيره العوضي”برنامجي يهتم بمشاكل المزارع والمهندسين الزراعيين وزوجي أكثر الداعمين لي

ما هي اكثر البرامج التي تحبي تقديمها ؟

مافيش برنامج محدد انا حاطه نفسي فيه احب أقدمه، كل الحاجات مفتوحة ومقبولة للمناقشة مادامت فيها خدمة للوطن والمواطن المصري، لكن مافيش نوع معين انا بقول مش هقدمه ولا ديني ولا سياسي ولا ثقافي لا يوجد عندي خط أحمر، كله عندي متاح أن اقدمه.

ما رأيك في الاعلام في هذا الوقت بالظروف التي يمر بها الوطن العربي ؟

احنا بنعمل بظروف صعبة جدا واحنا في مأزق كبير في الوطن العربي، واحنا محتاجين لدعم الإعلام عشان نخرج من المأزق ده، لأن الحالة النفسية للمواطن العربي لازم تكون مرتفعه وحماسية وتتخطي مرحلة الإحباط، لكن للاسف في بعض القنوات أغلبها بتكون خارج مصر بدون ذكر اسماء مش فاهمة كده، ومش حابه مصلحة الدول الاخري ودي مشكلة في حد ذاتها لأنها دائرة وبتدور، اذا كنا نواجه مشكلة اليوم في مصر أو إرهاب غدا نجدها في ليبيا في الإمارات في السعودية فده مش جميل لان هي دائرة وبتلف علي الكل.

ما هي الرسالة التي تقديمها في برامجك ؟

انا البرنامج بتاعي بيهتم بمشاكل المزارع والمهندسين الزراعين والفلاح المصري والمواطن المصري بشكل عام، اي حاجة تخص الزراعة حتي أهم من الصناعة، من لا يملك قوت يومه لا يملك حريته، لازم نوفر لهم اكل صحي سليم يصلح للمواطن المصري ويصلح للتصدير، اي مشكلة خاصة بالزراعة هو ده موضوع برنامجي، إلي جانب الاخبار الطارئة التي يكون لها احترامها من برنامجي.

من أكثر شخص دعمك في حياتك الشخصية والمهنية ؟

اكتر انسان وقف بجانبي في حياتي المهنية والشخصية هو فعلا زوجي، بعترف له بصراحه بوقوفه جانبي.

ماذا تعني لك كلمة رجل ؟

كلمة رجل احتواء أسرة مسؤلية شخصية إحترام دافع نفسي بيت أولاد بلد شعب جيش وطن راجل يعني كل شيء في حياتي وحياة البلد.

ماهي الاسرة بالنسبة لمشيرة ؟

الأسرة بالنسبة لي هي كل حياتي، يعني حتي لو دخلت مجال الإعلام فأنا دخلته عشان أولادي يطلعوا يلاقوا مستقبل كويس افضل واحسن عشان اوضح لهم حاجات ونقط غايبة عنهم، يعني انا دائما بسلط الضوء عليها غيري ما سلطش الضوء عليها، دي مصلحة لأولادي، يعني لما اسال أولادي عن المتحف الزراعي وهما مش عارفين يعني اية متحف زراعي، رغم أنه تاني أكبر متحف علي مستوي العالم بعد اللي في جنوب أفريقيا، وعشان كده انا حتي في مجال عملي بحاول اخدم أولادي حتي لو بشكل غير مباشر.

ماذا عن موقع الندم في حياتك ؟ وما أكثر شيء ندمتي عليه ؟

مافيش اي ندم في حياتي ابدا حتي كل خفاقاتي أو وقعاتي أو سقطاتي غير ندمانة عليها بالمرة اتعلمت منها، والمحنة ما بتكسرش بتقويني بتقويني فأنا غير ندمانة علي حاجة في حياتي الحمد لله طول ما ربنا راضي.

لو ظلمتي ماذا تكون ردة فعلك ؟ ومتى شعرتي بالظلم ؟

لما بتظلم بضحك لان انا عارفة أن هاخد حقي من عند ربنا هيعوضني خير، بالعكس ببقي فرحانه لان مش ظالمه، ومش بياثر عليا وبحس انه اختبار من ربنا ” انا خلقنا الانسان في كبد ” الإنسان خلق في محن عشان يعرف الفرق بين الكويس والوحش.

لمن تحبي ان تهدي نجاحك؟

اهدي نجاحي لبلدي مصر ولزوجي واسرتي و أولادي.