مقدمة من / سلوى نبيل
وقت التحضير / 120 دقيقة
المقادير :
اي نوع جيلي بتفضلوه
باكو جيلي توت
باكو جيلي تفاح
باكو جيلي مانجا
باكو جيلي اناناس
علبتين عصير اناناس صغيرين
علبه كريمه خفق حلويات
تقريبا نص كوب سكر بودره
٣ معالق جيلاتين بودر مدوبه في نص كوب ماء ساخن
ربع معلقه فانليا
الطريقه :
– دوبت كل باكو جيلي لوحده في معلقه ونص كبيره سكر وكوب ماء مغلي كأننا حنعمل جيلي عادي بس قللنا كميه الميه .
– حنقوم بتجميد الجيلي الاول علشان نعرف نقطعه يعني لو عملنا ٤ بواكي جيلي فاحنا محتاجين ٤ قوالب نبرد كل صنف لوحده الاول .
– فرشت القوالب كلينج فيلم اللي هو الورق الشفاف . فرشت القوالب وصبيت الجيلي فيهم ودخلتهم التلاجه .
الخطوه دي مش مهم شكل القوالب ممكن في اي صواني صغيره عندك . المهم الجيلي يجمد .
– طلعت القوالب وقطعت الجيلي مكعبات حتطلع بسهوله من القوالب لأننا فرشناها ورق شفاف .
– في وعاء تاني حنحط علبه كريمه خفق ٢٠٠ ملي عليهم نص كوبايه سكر بودره ونقلب وبعدين نضيف علبتين عصير اناناس وعليهم الجيلاتين اللي دوبناه في الميه السخنه .
– حنجيب القالب اللي حنعمل فيه الشكل النهائي ونفرشه ورق شفاف ونحط المكعبات كلها ونصب عليهم خليط الكريمه والعصير … نخبط القالب كويس على الرخامه علشان نطمن ان السائل اتوزع كويس .
– ندخل القالب التلاجه ونسيبه يبات تاني يوم نطلعه نقلبه ونقطعه . حيطلع بسهوله جدا .
و الف هنا على قلوبكم يارب
مدير مطبخ سحر الحياة / نيفين منصور
