بقلم : رانيا حجازي
–
سلاماً وعظمه . .
للي عنيها دبلت
م البُكا في الفراق
والمحّبه والإشتياق
واللي سابتْ قلبها
لواحد مفهِمش
وإللي زاد بكاها
لما إتقالها معلشْ
سلاماً وعظمه . .
للي خافت تحب
ومع ذلك حبت
للي سدتْ حق الوجع
من سنين ولسه بتدفعُه
واللي الخوف مسِكها
ف بِعدت عنْ حد
كانِت خايفه تودعُه
سلاماً وعظمه . .
للي رضيت بالنصيب
اللي نصين قسمها
نص بتحب حضن مش ليها
ونُصها إللي في حضن حد مش حباه
سلاماً وعظمه . .
للي ماتلها حد ولسه مستنياه
للي حبت بضمير ومع ذلك إتسابت
للي لسه مبدئها ثابت
سلاماً وعظمه . .
للي ماتت بعد اما قالت
اشوف وشك بخير
مع إنها لسه بتعيش/
سلاماً وعظمه . .
للي وجعها عدي السما
وتسألها تقول مافيش .
