قصيدة (سيدنا السيد )
مجدي فرج عامر
شعر عامي
سيدنا السيد قام يتوضي
وقعت منه السبحه الفضه
وطي يجيبها وكان حيسيبها
وراحو جابولوا طاسة الخضه
لما عنيه لمحت خلخالها
جات علي باله وجه علي بالها
ولما أتمدت إيده يشيلها
كانت إيدها أتمدت قبله
ولحظه إيديه وأيديها أتقابلوا
وتاه سيدنا ف دنيا غرامه
واتهيأله حلاله حرامه
وسرح فيها وداب ف عنيها
قال للدنيا أنا قلبي شاريها
دي غزال شارد جسمها فارد
جبت البيبسي وجبت البارد
وبقيت فرعون جوايا مارد
قعدت جنبي ف قعده مريحه
وقالتلي أنا عصفوره جريحه
غطيني بحبك وحنانك
حسسني بعطفك وأمانك
أنا حباك وبقولها صريحه
أنا عشقاك وأنا عشقي فضيحه
راح ألخبطلك كل فروضك
أهديني أزهارك وورودك
وملامحك جوه حاخبيها
قلبك واحه وشوقي ماليها
حاشرب من كاس حبك ليه
وحعيش أيامي الورديه
نسمه تعدي بتنده ليه
ونجوم بتنور لياليا
وصوابع إيدنا بتتلامس
قلبي يبوح لك بكلام هامس
بالرغم من الليل الدامس
شايفه ملامحك نور بينور
وكمان عفريت جن مصور
أوعي أتوه وعليه تدور
أقعد جنبي إيدك علي كتفي
وحناخد سلفي ونتصور
ويا الأهل وويا العيله
وفرحنا نخليه ١٠٠ ليله
وأعقل وأوعي ف يوم تتهور
الشاعر
مجدي فرج عامر
