حكايات ماما زوزو
بقلم / دكتورة زينب زكى
كان يا ما كان يا سعد يا اكرام ما يحلى الكلام إلا بذكر النبى عليه الصلا والسلام
كان فيه بنت ولد زى القمر أسمهم “رودى وعمر” .. حلوين وشاطرين ومن ماما هبة دايما قريبين .. بيسمعوا كلامها فى كل حاجة .
وفى يوم من الايام ماما هبة خرجت مع رودى وعمر الحلوين اللى زى القمر راحوا على النادى يجروا ويلعبوا وعن “ماما هبة” مش ممكن يبعدوا، وفجأة قابلوا رانيا ورحاب ..
فى المدرسة كانوا اصحاب .. طلبت رانيا ورحاب من رودى وعمر يجروا لآخر النادى يسابقوا القمر ..
لكن ماما هبة حذرتهم وقالتلهم اخر النادى فيه حفر فى الارض وممكن تقعوا وتتعورا .. لكن رانيا ورحاب كانوا اشقيا واقنعوا رودى وعمر يجروا معاهم يسابقوا القمر وميسمعوش كلام ماما هبة، وفعلا رودى وعمر سمعوا كلامهم وراحوا يجروا معاهم وبعدوا عن عيون ماما هبة ..
وفى لحظة وقعت رانيا وهى بتجرى على ركبتها واتصابت وصرخت كتير والاولاد مش عارفين يعملوا ايه وقعدوا يعيطوا ومش عارفين يتصرفوا ويعملوا ايه علشان خاطر رانيا ،وبسرعة فكر عمر وقال انا هجرى بسرعة انادى ماما هبة وهى هتعرف تساعدنا ياريتنا سمعنا كلامها.
وفعلا عمر جرى بسرعة وراح ل ماما هبة وحكالها وقالها على كل اللى حصل وبسرعة ماما هبة اتصلت بالاسعاف وراحوا جرى علشان خاطر رانيا
وقالتلها انا اسفة يا طنط هبة انى ما سمعتش كلامك وكمان اقنعت رضوى وعمر يجروا معانا نسابق القمر .. والنتيجة كانت اصابتى فى رجلى ..
من النهاردة هسمع كلام الكبار ومش هقنع اصحابى تانى بحاجة ممكن تضرنا كلنا
ماما هبة سامحتها وقالت لأولادها الشاطرين شايفين يا حبايبى اللى ما يسمعش كلام الكبار ممكن يحصلوا ايه ..
وفهمت رودى وعمر .. الحلوين اللى زى القمر ان لا يمكن يتشاقوا زى رانيا ولازم يسمعوا كلام مامتهم هبة علشان ما يحصلش تانى مواقف مرعبة تخوفهم هما واصحابهم زى ما حصل مع رانيا.
وتوتة توتة خلصت الحدوتة
للمزيد تابعونا على موقعنا:
مجلة سحر الحياة
