بقلم / شرين سعد أحمد …شاعرة جنوب الوادي
*********
وادي وشوش الناس
طلت هنا عانت
وماليها دا الإحساس
فيها العبر بانت
يامكتر التجاعيد
محفورة من بدري
وقلب يبقى حديد
وكأنه مايدري
الطفل بدري يشيب
من كتر أهواله
والحزن قلبه يصيب
ويغير أحواله
عيني على أمه
واقفة بتتقطع
شايله يادوب همه
ولصرخته تسمع
وادي عسكري واقف
شايل سلاحه معاه
للغدر اهو شايف
يكتمها جوا الآه
ويصد بدراعه
اشي ضربه ورصاصة
اسم الشهيد زاعوا
بالفرقة قناصة
وادي بنت بضفيرة
والبسمة على وشها
ماهي باينة اهي فقيرة
بس الرضا كنزها
وادي العجوز رافع
راسه بلا كَسرة
وبحكمة من واقع
مامعاه ولا كِسرة
ولا مرة بيطاطي
ماتعرف اللي فيه
دا المولى اهو العاطي
رامي حموله عليه
الناس هنا اشكال
وألوان تلاقيهم
وبتتقل الأحمال
والدنيا تلهيهم
بس النهاية فين
الكل مش عارف
وتشوف في دمع العين
العمر بات خايف
ومهما يتفرقوا
اهو في الطريق واقفين
بالصدفة يتقربوا
وبيسالوا على فين
يا دنيا واخدانا
اشي ضرب واشي تلطيش
والغفلة لاهينا
والعقل غلبه الطيش
عجبي على حالنا
تايه بلا رجعة
لو نوزن أفعالنا
مانوقع الوقعة
ولا نتكفي واقعين
بالحسرة على وشنا
لو للنصيحة سامعين
ماحد هيغشنا
ودي عبرة مكتوبة
من قلبي قايلاها
بالكلمة محسوبة
وبعمري ضامناها
اقرا أيضآ:
همسات ليلية … فراشة حمقاء
