أنا الملكة الجميلة

حكايات ماما زوزو

بقلم دكتورة زينب زكى

أنا الملكة الجميلة اللى قررت تفضل ملكة متوجة فى بيت أبوها أكرم مليون مرة من أنها تسيب ودانها ل كلام الناس ول جملة مش هنفرح بيكى بقى .. 

أنا الملكة الجميلة اللى قررت تكون ناجحة فى حياتها العملية وقفلت ودانها عن الجملة المشهورة “ضل راجل ولا ضل حيطة” .. وإتسندت على ربنا سبحانه وتعالى وعلى مركزها ونجاحها وتفوقها .. وقررت تلغى الجملة دى من قاموس حياتها .. 

أنا الملكة الجميلة اللى قررت تطلق اسم ماما قبل اسمها .. علشان تقول لكل البنات .. خللى بالك .. وأوعى ترمى نفسك .. وجمالك .. وشبابك .. ونجاحك فى أى جوازة والسلام .. لمجرد انك عاوزة تسمعى كلمة ماما .. مع ان فى اطفال كتير مالية دور رعاية الأيتام تقدرى تروحى تجرى وتلعبى معاهم وينادوكى ماما بمنتهى البساطة ..

أنا الملكة الجميلة اللى هتفضل معتزة بعرشها وبمملكتها فى زمن غاب فيه الملوك والأمراء اللى بقينا نسمع عنهم فى الحكايات والروايات بتاعة زمان وبس .. وكل يوم نفتح عنينا على حالات طلاق لأزواج ما زالوا فى بداية حياتهم وتبدأ سلسلة من المشكلات التى لا نهاية لها إلا خلف أسوار المحاكم .. لغياب الضمير وانعدام الأخلاق وأطفال أبرياء يدفعون أثمان لذنوب لم يرتكبوها فيخرجون للحياة معقدين نفسيا غير أسوياء

وأنتى أيضا عزيزتى

تربعى على عرش مملكتك فى بيت أهلك وإستمتعى بهدوءك وسلامك النفسى .. 

فلا تسلمى قلبك .. إلا لمن يعرف قدرك .. ويحافظ على عرشك .. وتكونى فى بيته ملكة متوجة مثل ما كنتى قبل أن تعرفيه .. وأخيرا وليس آخرا .. 

إحذرى من عثرات الطريق !!!

ماما زوزو