بقلم/صفاء القاضي
ابني جيفارا مات
وخدت عزاه مع إني
مشوفتش البنات
ولا اتجوزت وحدة
ولا لبست دبلة
وعايش في السكات
جيفارا حلم عندي
من اول الزمان
كل لما زمان يعدي
بستنى في المكان
دورت عليك يا ابني
واستنيتك كتير
وحلمت بيك جميل
طيب ذكي ونبيل
بتحب دينا اختك
وشقي ومدهش كمان
حبيتك زي عمري
حسيتك نبض قلبي
كبرتك وسط دنيا
بحلم بيها لنفسي
وتبقا أحسن مني
وتشيلني وقت عجزي
جيفارا ياللي مات
من قبل ماتتولد
مرضيتش أجيبك يا ابني
في دنيا بتتهبد
دنيا فيها عاليها
أصبح فيها واطيها
دنيا فيها الفلوس
تتقاس بيها النفوس
وبيها بتتوزن
جيفارا أنا خفت أحسن
تلقا الضلمة في طريقك
وتعيش لحظة خيانة
من حبك أو صديقك
خفت ياحتة مني
متلقاش التمنى
ولا حلم بتحلمه
ولا دنيا حلوة فيها
ولاضحكة هتلاقيها
خفت الألم يصيبك
ماتلقي دوا يفيدك
ولا تلاقي طبيبك
ولا علم تعلمه
سميتك يا ابن عمري
جيفارا عشان تكون
للمريض مداوي
وعالفقبر حنون
وتكون للحق دايما
وتكون انت الأمل
وفي قلبك ميت أمل
في الحب وفي الحياة
وتعيش روعة حياة
طاقة حب بجنون
والقلب بيك مفتون
بس الحياه الكئيبه
بتقلب في اللي كان
يرجع تاني الزمان
ويموت جيفارا تاني
في زمان غير الزمان
ومشيت قبل متيجي
ولاجاش ميلاد لاسمك
ولا شهادة ميلاد
ابني جيفارا مات
في عتمة الحاجات
وقبل مايتكتب
كتبت اسمك يا عمري
جوا شهادة وفاة
ابني جيفارا
مات
