إلهام غانم عيسى
كتبت الفنانة السورية رغدة عبر حسابها الشخصي على الفيس_بوك :” الشعب اللي بيعمل من لب الكوسا مية أكلة واللي بيخبز عجينتو بصبرو ع نار شمعة واللي بيحول بواقي الطبيخ لأكلة جديدة و اللي حبة بطاطا بتتحول ف ايدو لعشرمية أكلة مالحة وحلوة واللي ف بيته عصر البندورة العجوز وطلع منها صلصة والفليفلة الشرسة طحنها وخزنها والخضرة حتى الذبلانة بملح دموعه جففها والبرغل انطبخ في ايدو بمية طريقة وطريقة حتى العدس أثبت جدارته في مطبخه بألف طريقة حتى انطبخ بمية المطر يوم ماكانت مية السواحل فيها ملوحة حتى لب البطيخ والقرع والشمام مع شوية حمص وزعتر من الأرض أخضر حولو لزعتر
الشعب إللي صنع حبة الجبنة ف بيته والصابون واللي بناته نعمت شعرها وقت الشدة بدل البلسم بالبيلون ومن بواقي القماش العتيق عمل لحافه واشياءكتير
وبالخيش لف ثلجاته ف عز الصيف
حتى دمور كياس القطن غسلها و عمل منها كلاسين وفانلات لولاد رضيانين
الشعب اللي التعن عيشته وصمد ف حرب أكثر من 8 سنين شاف فيها الويلات من فوقه وتحته وخلفه ومن الشمال واليمين قتل وخطف وتهجير ودمار بيوت ومصانع بناها بعرق الجبين
الشعب اللي استحمل قطع الكهربا وقطع المي وقطع رزقه سنين واللي ا
الشعب اللي دفع دم ولادو وبين جنازة وجنازة جنازة مااشتكت لغير رب العالمين حتى اللي انأسر تحدى موته م الدواعش وعلا صوته : والله لنمحيها هيدا الشعب لابتكسرو حرب ولا بنزين
أفهموها وفهموها للي مش فاهم والقلقان ع بلدو من المغتربين”
