اسم الوصفة السابليه??
مقدم من مطبخ ايمان عادل
المقادير
٣٠٠ جرام دقيق
٢٠٠جرام زبده
١٠٠جرام سكر بودره
بنضرب الزبده مع السكر يهيش ويبيض ننزل بالدقيق
تلم كويس ونلمها ونفردها بين ورقتين زبده
بسمك وسط مش تخين قوي عشان احنا بنضيف اتنين ولا رفيع يعني حجم مناسب ونرفعها بهدوء علي صنيه واحنا بنسحب ورق الزبده ونضغط بالقطاعات بعد منغطسها في دقيق ونفضها كويس ومنحركهمش من الصنيه ندخلهم الفريزر يجمدوا كويس ونخرجهم ونشيل حبات السابليه بمنتهي السهوله
كل شكل بنشكله بنعمل واحد عادي وواحد نفس الشكل مخروم من النص اما بقطاعه اصغر نفس الشكل او بقمع تزيين من الشكل المدور اللي تحت وده قبل مندخله الفريزر وبمجرد ميجمد بنضغط بايدنا الجزء ده بيطلع بسهوله
ونرصهم في الصنيه الالومنيوم مع ترك مسافات ويدخلوا فرن محمي مسبقا علي درجه حراره ١٧٥ في الرف الوسط تلت ساعه اول لما ياخدوا لون حلو خفيف من تحت ومنحركهمش الا اما يبردوا ومنشغلش الشوايه بيبقي لونهم ابيض من فوق او محمر علي خفيف
ولو في قوالب السابليه بنحط قطعه مناسبه من العجين و بصابعنا الكبير بنضغط لما تتفرد كويس في القالب ونشكها بالشوكه او خله السنان عشان مترتفعش وبس تاخد لون بنخرجها ونسيبها في القالب تبرد بس تبرد بنقلبها بتخرج بسهوله
التزيين
كل واحده كامله بندهنها بمربي اونوتيلا او شوكولاته مذابه او كراميل اوجناش
اللي نفسها ومخرومه اما بنرشها بسكر بودره ونلزقها علي الكامله
او نغطسها بالشوكولاته ونحطها في طبق بيه مكسرات مجروشه او سكر فرماسيل
اوجوز هند اي شيء تفضلي
بالنسبه للي في القوالب بنحشيهم كراميل اوجناش اوشوكولاته سايحه ونزينهم بالمكسرات.
اتمني الفكره تكون واضحه وصحتين علي قلوبكم.
