يكتب: الأثري/ محمود فرحات
للمجتمع المصري ثقافة شعبوية تجمع كل المصريين، وهى مش ثقافة دينية خالصه ولكنها ثقافه شعبويه إتشكلت خلال عصور مختلفة من عقائد وثقافات مختلفة .. وهى بتمثل جزء مهم من تاريخنا وحياتنا اليومية .. فكل واحد مننا جواه.. وفى تكوين ثقافته حضارات متراكمة من عصور سالفة ومحاضرة.. من العصر الكميتي القديم والقبطى المسيحي والقبطي الإسلامى أثرت العصور دي مع بعضها على تشكيل تفكيرنا ووعينا
وعلشان المصريين بيعيشوا بيوتهم جنب بعض منغير تفرقه مسيحين من مسلمين عايشين في بيئة مصرية واحدة ومناخ واحد .. بياكلو من عيش واحد ويشربون من مايه نيل واحده .. فإن البيئة الواحدة دي هى اللي صنعت الموروث الشعبي المشترك ده..!!
علشان كده لما نقرا كتب المؤرخين بتوع زمان نلاقيهم بيقولوا ان المصريين كانوا بيحتفلوا بعيد الغطاس مسيحيين مع مسلمين في نهر النيل .. فنلاقي شيخ المؤرخين المصريين المقريزي بيقول..
(على مدار التاريخ المصري ، اعتمد المحتفلون المصريون بعيد الغطاس طريقة بديعة في الاحتفال ، عن طريق تزيين صفحة نهر النيل بمئات الشموع والمشاعل المزخرفة ، والخروج في مواكب حاشدة كُبرى قاصدين النهر ، في حين يُعرب الخليفة المصري عن سعادته غالبًا بتوزيع النارنج والليمون والسمك البوري والقصب)
ومن الحاجات اللي سابهلنا الموروث الشعبي الامثال الشعبية عن عيد الغطاس فنلاقي الشارع بيقول (غطستم صيفتم….) و(اذا غطس النصراني طلع الدفا الجواني) وكل الامثال دي بتدور حولين الدفا اللي بيجي بعد عيد الغطاس كما عبر عنها واستقر في وجدان التراث الشعبي المصري
ولو دورنا هنلاقي في تاريخنا إن العيد دا ممتده جدورة لـ كمت (مصر القديمه) واللي عرفت عيد مشابه هو عيد الانقلاب الشتوى وكان المصريين بيغطسو فيه فى ماية النيل والمعتقد انه كان بمناسبة حرت الارض و نتر البذور ويمكننا تصديق الروايه دي في ظل كلام المقريزي اللي فات وطريقة احتفال المصريين في نهر النيل..!!
لكن السؤال هو ليه المصريين دلوقت نسوا اللي كان جدودهم بيعملوه؟؟
نسوا احتفالاتهم المشتركة وبقا عندهم حاله عداء مجتمعية ضد بعض؟؟
وبقا المجتمع بيتصنف مسلمين ومسيحين وغيرها من التصنيفات؟؟
منين جابت الاجيال الحاليه كل حاله العداء وعدم التسامح دي؟؟
وليه قرر المصريين التخلي عن هويتهم المصرية.. ؟؟ ولمصلحه مين..؟؟
محتاجين نجاوب مع بعض على الاسئله دي..؟؟؟؟
وكل سنه والمصريين بخير وسلام ومحبه و #عيد_غطاس سعيد علينا كلنا،، وكلوا قصب وقلقاس…. 💖
#مصر_بيتنا ☥ 🇪🇬
#بعث_الهوية_المصرية
#بعث_الامة_المصرية #تراثنا_هويتنا_حاضرنا_ومستقبلنا
#الهوية_المصرية_تجمعنا
#الوطن_للجميع
