مجدي توني بكلمات شعرية عن بيئته وفلسفة الحياة والنصح والصبر وواقعية معيشته

متابعة : حاتم عبد الحكيم 

عن بيئته :

بحبك يا بلدى لحد ماموت
بحب قعدة المصطبة تحت شجر التوت
بحب النسمة اللي فى الصيف جايه من بحرى
وشمسك الدافية بعد العصر على الكبرى
وذكريات زمان ولعبة السيجة
ومين اللى غلب وكل كلاب كتيرة
ويضحك الناس على المغلوب ويقوم زعلان
زى ما يكون بظله محصول فدان
ويروح زعلان ويمكن يمرض ويقعد شهر ما يبان
بحبك يا بلدى

عن فلسفة الحياة :

أفكر أن أرجع طفلا
هدفه أن يلعب طول النهار
ويبت مساء ليصحو ويلعب بلا هم ولا أفكار
ترى هل أرجع أم أنى حمار (وعجبى)

عن النصح :

يا عم عباس مالك ومال الناس
سيب اللي فاتح بابه واللي قافل بترباس
واللى لابس هدوم واللي معندوش…
بدل المستور ما ينكشف وتداس

عن الصبر :

لما المثلث يكون مقلوب
والهموم ملت العقول والقلوب
مفيش ملاذ غير رب الغيوب
قول يارب هتنفرج كل الكروب

عن واقعية معيشته :

ايه يا عينى طب منين ده لوفيه كنت ابقا مسرور

دا اللي جيباه القرعا وخداه أم الشعور

هوا أنا أغنى من المدرسة ولا الإدارة
ولا عندى حتى حمارة
ولا بدخن سجارة
دنا الحمد لله مكفي عشا نوم وبصوم اتنين وخميس
علشان أسعد فى الآخرة مانا فى الدنيا من المتاعيس