عيني وكمان عيني علي حد مني
مش شايفني رغم كل القرب
على روح في روحي بتقتل البسمة
وتلاقي كل الاهتمام من الغرب
علي حلم عابر يرسمك فيا
قاصد يلخبط يومي ويسيبني
علي طيف بياخد ضحكتك دي نيشان
علي حضن قلبي ليك في عز الحزن
علي كل شئ جوانا كان أو هان
علي قلب يلمس ضحكتك يدفي
مهما يكون بردان
الليل ده نص المحرومين من الحب
بيكملوا بيه الهوى وحدة
هي الجميلة رغم كل الحلو
مابشوفش غيرها في الغياب واحدة
ياعيني خافي من سهام العشق
علشان بترشق في الضلوع وتصيب
كل الدموع بتصيب وتزول بفعل الوقت
وعشقها جوه الوريد بيشد مش بيسيب
الموجة جاية من الشمال للجنوب
والحب فرع بيبتدي منك
يخلص في كل نهاية يبقى معاك
موشوم في روحي حلمها جنة
ولا غيرها بتمنى مهما يطول الوقت
الحلم هو الحلم غلاب وطبعه جميل
بيبص جوه الصورة علشان يشوف
حسنها فيلاقي ألف دليل
عيني وكمان عيني قلبي اللي ساكت
دق
هشهد شهادة حق إنتي اللي ملكاني
الدنيا لو هتلف وتيجي ناس وتروح
إنتي اللي جوه القلب وإنتي اللي وحشاني
