بقلمى
نجلاء فتحي عزب
وبيسألوني خسرتوا بعض ؟
وخسرتوا بعض ازاى وليه ؟
وبيلوموني
على ابتعاده وابتعادي
قلت عادي ..
بطلنا نحكي بطلنا
نشكي بطلنا نتكلم
والسكوت بقى
جدار جوايه و فيِه
حد تانى هيسأل
وانا جاوب عليه
ايوه انا اللى بسأل
وسكتوا ليه .!؟
سكتنا علشان بطلنا نحلم
بطلنا نفرح و نقسم
كل فرحة عليَّه وعليه
بس كده ولا لسه فيه حاجات ؟
أَمَرْ وأقوى ما السكات ..
أيوه في لما ابص فى المرايه
الاقي نفسي ومالقاهوش
لما هوه عني يحكي
و ينسى اسمي ماينطقوش
لما امشي علشان اقابله
والخطوات مابيعدوش
لما استناه يقول
وهوه يتعدى الأصول
لمَّا ينسى أو يطنش فى الكلام
أو بيهرب مالسؤال
ليه ؟ عشان أصلاً مش عاوز حلول !!
لما يقفل أى باب
لما يبص فى الكتاب
ولما يغيب بدون أسباب
كل ده وتقولوا ليه ؟
هوه أكتر من كده إيه ؟
فالخلاصه خسرنا بعض
لما بطلنا نتكلم ..
لما بطلنا نتعلم ..
لما بطلنا نرحم
لما بطلنا نِحِن
لما بطلنا نِئِن
لمَّا بطلنا نتألم
لما نكون بعيد عن بعض
ببساطة كده
خسرنا بعض ..!!
مدير قسم الادب والشعر
علا السنجري
