كتابة رانيا الجعبري
أول متسمع تتر مسلسل هوانم جاردن سيتي تلاقي شريط الزمن الجميل كله بيعدي من قدامك ..
رمضان ساعتها كان مختلف اوي أهم حاجه الفطار كان الساعه 5 وعلي آخر رمضان بيكون 5 إلا ربع ..
ومسلسلات رمضان اللي كانت علي الأولي والتانيه بس .. وايامها كانت امتحانات نص السنه في رمضان وغالبا بتكون في الشتاء ..
والشعراوي قبل الفطار اللي اول متسمع الموسيقي بتاعته تطمنك. . كده قربنا نفطر. .
والفوانيس اللي بالشمع… والزينة اللي كانوا بيلموا من الجيران عشان تتعمل والراجل بتاع الفول اللي منور قدامه بليل ..
والبومب والصواريخ اللي بنحوشهم من قبل رمضان بشهر مش عارفه ليه ..
والعيد ولبس العيد اللي كنا بنام جنبه لحد الصبح..
كل حاجه كانت حلوه ..
لما بسمع تتر المسلسل.. بحس أننا لسه صغيرين والمدرسة والضيفرتين والداده اللي كانت بتدوينا المدرسه. .
ريحة البيت اول مرجع من المدرسه وشكله ونضافته…
ابويا وأمي وهما قاعدين في البلكونة ..
تليفون البيت اللي كنا بنشيل الفيشه عشان ندخل نتكلم من مكان تاني. . وبابا لما كان بيقفله والفاتوره تيجي كبيره لأننا كنا بنفتحه طبعا..
التليفون القرص وبعدين اللي بزراير. .
افتكرت برضه زلزال 92 والناس اللي بيوتهم قديمه لما جم باتوا في عمارتنا عشان جديده .. وأنا واقفه في الشباك فاكراه مازينجر هيعدي لأنه كان بيهز الأرض لما بيمشي. ..
أيامنا كانت حلوه أيام كرتون توم آند جيري وباباي اللي بياكل السبانخ وكعبول وكابتن ماجد وبطوط وسينما الأطفال يوم الجمعه…
حتي سر الأرض كنا بحبه. .
أيام الاتاري ولعبة سوبر ماريو اللي كان دايما واحد بس في البيت هو اللي بيعرف يوصل لأخرها. . وكلنا نقعد نتفرج منبهرين لحد ميقابل الوحش ويقتله ويتجوز العروسه في الآخر …
ايام السهره الدراميه اللي كانت تقريبا كل ثلاثاء. . واكتر سهره نجحت زواج علي ورق سلوفان بتاعت مني ذكي وأحمد السقا…
وتاكسي السهره يوم الاتنين واخترنا لك يوم الأربعاء ..
ده غير بقي مسلسل الساعه 8 علي الأولي والساعة 9 علي الثالثه والضهر بيكون في فيلم عربي قديم . وغالبا بيكون لاسماعيل يس …
كانت ايام حلوه أيام حكاوي القهاوي وكلام من دهب .. أيام اللمه.
ايام جدي وجدتي وهما عايشيين. . لما كنا دايما بننكشهم .. بس برضه بنحبهم ونموت فيهم…
أيام ماكان البطل هو سمير صبري في فيلم جحيم تحت الماء. ..
.. افوق بقي وانا بكتب الكلام ده وسرحت وعلي وشي ابتسامه كده علي حد كده بيقولي مامي انا جعان ( ايه ده هو انا كبرت وبقي عندي ولاد كمان )
##استمتعوا بحياتكم لانها هتعدي بسرعه..
# استمتعوا بوجود كل حد في العيله لأنه بعد شويه مش هيبقى موجود ..
# استمتعوا بشكل كل حاجه موجوده في حياتكم ..
