كتبت الخالة وداد
امبارح ياولادي لما كنا بنلعب لعبة تبادل الأدوار كان السؤال بيقول حط نفسك مكان شخص ارهابي وشوف مبرراته للعمل ده .وكعادة شعبنا يحب يهاجم بدون ما يتبين وفاكر نفسه بعيد عن الجريمة!!! الشخص الارهابي مبيسلكش سلوك الا وليه مبرراته.فعباره “مفيش مبررات تخليني اقتل واسفك الدماء غلط” لان من وجهه نظر مرتكبها في اسباب واسباب كتيير اوووووي ودي اما بتبقي أسرية بسبب تفكك الأسرة وان مفيش احتواء ومراقبة أو متابعة او بسبب قلة الوازع الديني او فهم الدين غلط واعتبار الدين محصور علي كام شيخ متشدد من هنا علي كام قناة من هنا…اما بقي الفقر والظروف المعيشية او الانتقام….
بدليل ان الارهابي الي بنطلق عليه اللفظ ده هتلاقي منه الدكتور والمهندس والصحفي وغيره ناس قيمة يعني ومع ذلك بتسلك سلوك شاذ وده لان عندهم عقيدة فكريه ثابتة تجاه الي بيقوموا بيه وبيبقوا حاسبين كل حاجة.ولما طلبنا تحط نفسك مكانهم…ده لان في عملية التحليل النفسي بنرجع النتيجة للاسباب فبدل ما احنا كل شوية بنتهم بعض بأي تهمة نشوف نفسنا مكان الي بنتهمه عشان يبقي حكمنا عادل بمعني متعودش احكم علي اي شخص الا وانا شايف نفسي مكانه الاول…الي حصل بقي كل الي رد علي اللعبة دي شايف نفسه بعيد عن الارهاب!!!!!! طيب اومال الكآبة والاحباط والانتحارات والغيبة والنميمة والفضايح والشتايم وكمية الانحلال الاخلاقي ده ايه؟؟؟؟
ماهو ارهاب الارهاب انواعه كتير وبيبدأ من مجرد كلمة…ولو انت شايف ان مفيش مبرر للارهاب او الجرايم الكبيرة يبقي مفيش مبرر انك تفضح وتغتاب وتنم ومفيش مبرر تحكم علي غيرك من غير ما تتبين ومفيش مبرر تسخر وتتهكم وتتكبر ومفيش مبرر لأي فعل شايفه عادي وهو منافي للدين….
ياريت نتعود نحط نفسنا مكان غيرنا عشان نقدر نحدد المشكلة ونعالجها لان عمرك ما هتقدر تعالج مشكلة ياولدي وانت شايف نفسك بعيد عنها ومستحيل توصلها وعمرك ما هتقدر تقضي علي ظاهره وانت مشحون من الطرف التاني ابحث وشوف وبعدين قيم لان ممكن في ثواني كلنا نتقلب لارهابين فكرا وقولا وفعلا لو العقل اتغيب واتحكمت فينا الظروف بأسوأ من كده في لحظة ضعف انسانية….
ممكن جدا لو قدرت تعرف السبب وتقرب من شخصية القاتل او المجرم او حتي الارهابي تقدر تعالجها وتقضي عليها لكن اصابع الاتهام والعناد وتبادل الاتهامات بيزيد من حده وعنف اي ارهابي مغيب وعنيد..
