أنت الأمير
بقلم: مها نور
عالم مسحور مجنون تبص عليه من بعيد يسحرك تتمني تقرب وتجرب تخبط علي الباب يفتح البواب ،بوابة كبيرة جميلة أنيقة بتلمع كما الدهب تلمسها فجاة تكهربك تتخض بس هتعاند وتكمل تدخل من الباب وتسيب الباب مفتوح
تمشي في طريق طويل مليان ناس كلهم شبه الملايكة وشوش هادية ورايقة حد يدعيلك دعوة وواحد يهديك قلب والتاني وردة تخدهم وتكمل في طريقك فجاة تتكعبل في صخرة اوعي تتكسر قوم يلا بسرعه
بص وراك سلم عليهم قبل ما تكمل ايه ده مش معقول اللي ادولك الورد والقلب ودعولك هما اللي رمولك الصخرة لا مش ممكن اكيد أنت غلطان طب بص قدامك يلا وانسي اللي كان الطريق لسه طويل شد ضهرك وكمل
فجاة تلاقي بيت كبير جواه ناس كتير حضنين بعض بحب تتقدم خطوتين كمان تلاقيهم كلهم غرزين السكاكين في ضهر بعض اجري اهرب اوعي يسحبوك ويخلوك تمص دم اخوك امشي يلا ابعد واوعي تستني وتاني تعند
ياتري ايه اللي بعيد ده دي وحده غلبانه محتاجه عايزاك توصلها انت ناسي انك أمير وتعرف من علية القوم ناس كتير ساعدها اوعي تبخل عليها مد اديك ووصلها خدها تحت جناحك يلا فرحها عملت اللي عليك يلا كمل في الطريق فجاة تحس بألم في اديك تكلم نفسك معقول دا أنا وصلتها وشيلتها دا جزاتي بعد ما فرحتها تجرحني في ايدي اول ماوصلتها انا مش قادر اكمل لازم اجري واهرب
رجلي تقيلة مش عارف اجري هو انا صحيح مش قادر اجري ولا عشان لو خرجت مش هبقا امير اسأل نفسك وجاوب بضمير وافتكر دايما ان مش كل حاجة بتلمع دهب او سولتير ومتنساش الباب لسة مفتوح واوعي تفقد الأمل هتلاقي اللي في يوم يحبك بكل وضوح من غير غدر ولا جروح ولا عشان انت كنت في يوم أمير
