بقلم رانيا شكري
خمس طرق فعالة لتربية ابنك او بنتك وتحويله/ها لشخص اعتمادي علي الاخرين، كاره نفسه وحياته واللي حواليه ، شحات مشاعر حب وجعان انه يتشاف طول الوقت:
١-طبق طريقة الثواب والعقاب علي كل تصرف بيعمله وخلي حكمك عليه هو الفيصل الوحيد في تقييم سلوكه حتي لو حكم جائر ، متحيز ونابع من عقدة نفسية جواك. ……،،كده انت حتنجح في انك تخلي تقييمه لذاته نابع من رأي الناس فيه ، ميعملش الصح الا لما حد يشوفه ومعندوش مشكلة انه يغلط مادام محدش حيحس بيه ولا يعرف ( مادام in public ومفيش مشاعر so what) .
٢- اربط اظهارك اي مشاعر حب ليه بسمعانه لكلامك وتنفيذ اوامرك والعكس صحيح، صدرله القسوة لو فكر يخرج بره الخط اللي انت رسمتهوله او انصرف عكس المفروض بتاع حضرتك وصب عليه وقتها كل لعناتك ( وقلبي وربي غضبانين عليك )
وبكده حتبقي ابدعت في تربية شخصية بيسموها في علم النفس ( approval junkie)
بيحاول يرضي الناس دايما ولو علي حساب نفسه علشان يوافقو علي تصرفاته ومبيفكرش يخالفهم حتي لو كان صح لا يترفض ويتقابل باستهجان.
٣-تجاهل مشاعره ورغباته ووجوده هو شخصيا، حيطلع باحث دؤوب علي لفت الانتباه ( attention seeker)
وعايز دايما يبقي في دايرة الضوء حتي لو الضوء ده نار وانتقادات سلبية( اهه برده حيردم ويملي الجزء الفاضي اللي حضرتك فضلت تحفر فيه سنين بالتجاهل).
٤- عيش حلمك من خلاله واجبره يمشي الطريق اللي كسلت او معرفتش تمشيه. حيطلع تايه وكاره دراسته و حيشتغل شغلانة بتاكل من روحه كل يوم لانه بينفذ مخططك ورسالتك انت في الحياه مش رسالته.
٥-واخيرا وطبعا ليس آخرا، متسمعلوش وارهبه واضربه ومرمط بكرامته الارض واشتغل علي انك اخر انسان علي وجه الارض ممكن يلجألوا لو احتاج نصيحة او وقع في مشكلة. علطول حتلاقيه اترمي في احضان اول حد سمعه كلام حنين حتي لو كان السم مستخبي فيه ( بتحصل اكتر مع البنات).
اعمل كل الخطوات دي واضمنلك حتطلع ابنك بني آدم تعيس في حياته ، ادعي ربنا ميفوقش ويفهم وانت لسه عايش .
