حوار تخيلي
نهار داخلي
منزل غير مرتب
الزوجة
تتحدث وهي تنظر من حين لأخر علي الزوج الذي يجلس ممدد الساقين
ومرتدي ملابسه الداخلية وغير مهندم بالمرة وهي في غاية الغضب
ترفع الملابس المتناثرة علي الأرض وتحاول إعاده ترتيب المفرش علي التربيزة
الزوجة :
إيه ؟
محدش بيرحم ليه ها ؟
هتتشلوا لو حطيتوا الهدوم في مكانها
ومنعكشتوش الدنيا
ثم تنظف حول طفلها الصغير
الزوجة :
وإنت يا أخر بختي
كانت نقصاك يعني ؟
منه لله الدكتور الحمار اللي دبسني فيك
وتقترب من إبنتها التي تذاكر
الزوجة :
حلي كويس يا هانم … ولا إنت مش فالحة غير في التلفزيون
وتنظر لإبنها الذي يلعب علي التاب وتشده من شعره
الزوجة :
إيه ياولا ؟ سيب التاب وأعد ذكرلك كلمتين ينفعوك يا فاشل
الولد :
مليش نفس… وبعدين أنا عايز أنزل ألعب كورة
الزوجة :
كره إيه ونيلة إيه ؟
هي ناقصه فشل يا فاشل
الولد :
مش مذاكر هي بس ياله
الزوج
يمسك برموت التلفاز ويدور بين القنوات في سكون تام
الزوجة تنظر إلية شذرا
الزوجة :
هتعمل إيه في موضوع إبنك ؟
الواد مغلبني مش عايز يذاكر
الزوج لا يعطي لها أي رد فعل …فتوجه كلامها للأبناء
بس ياواد روح ذاكر يا بلط … وإنتي يا ست هانم لمي الكراكيب اللي في أوضطك ..أنا مش الفلبنية بتاعتكم
الزوجة في حدة أكبر :
أمك إتصلت وعيزاك تكلمها … وأختك جاية عندنا بكرة
الزوج لا يعطي أي رد فعل
الزوجة :
هعمل ملوخية علي الغدا ولا تحب تاكل حاجة تانية ؟
أصل أنا معنديش غير ملوخية
الزوج ينظر إليها بطرف عينة ويمد شفتية وفقط
الزوجة في غضب :
إنت مبتردش عليا ليه ؟
هو أنا بكلم نفسي ؟
الزوج يبتسم إبتسامه مستفذة :
عادي يا حببتي
أنا زوج مصري
لو رديت أتحرق
الزوجة تبتسم إبتسامة صفرار مع رفع حاجبها الشمال
الزوجة :
كده … طيب أنا هتصل بماما علشان تيجي تقعد معيا أسبوع
الزوج يبتلع ريقه ويضع الريموت ويقف مبتسما
الزوج :
إنت يا واد يا إبن الكلب تعالي هنا علشان أذكرلك
ويقترب من زوجتة ويقبل رأسها ويقول
الزوج :
أنا مليش بركة إلا إنت
وينصرف من أمامها حاملا الملابس الي داخل الغرفه
لتجلس الزوجة وتمسك الريموت وتشاهد المسلسل التركي
حوار ل …رانية المهدي
