العرض مستمر.
بريد القراء أعداد: هويدا صابر
مش كل مشكلة في حياتنا حتي لو صغيره علي طول أجري علي الطبيب نفسي من غير تفكير ، وأطلب أدويه ومهدئات ومنومات أحيانا ، ليه هو في أيه؟ أبدا شوية زهق علي أكتئاب.
دي مشكلة السائلة ز ع:
أنا عندي 29 سنة ومتجوزه عن قصة حب أول صدمه في حياتي كانت وأنا في الجامعه لما أتصدمت في حبي الأول ولجأت لطبيب نفسي للمساعده وأخدت أدويه ، بعدها كل صدمه ليه ولو بسيطه مثلا أتضايقت في الشغل أو من واحده صاحبتي علي طول الدكتور النفسي أو أكرر العلاج مني لنفسي 3 شهور أو 6 شهور وهكذا ، لحد ما في مره بقول لزوجي أنا عندي توتر ومخنوقه ونفسيتي تعبانه ولازم أروح لدكتور نفساني ، قالي أصلك مجنونه هو أنتي مش عارفه أني عارف أنك بتروحي وبتاخدي أدويه أنا أللي زهقت واتخنقت منك 24 ساعه تعبانه وشكوي ومتوتره ونفسيتك تعبانه في أيه بالظبط ، وأنا بحبك وبخرجك وبدلعك وطلباتك كلها مجابه مفيش فايده ، عندك بيت وزوج وبنت وولد مفيش الحمدلله أيه الهم أللي أنا فيه دا والله لو مبطلتي لطلقك واخلص منك وساب البيت بقاله شهر مبيردش عليه وبيبعت مصاريف ولاده مع أخته ، أنا أعمل ايه مش فهمه أنا فعلا بحس أني نفسيا تعبانه والله.
———————
السائلة الكريمة:
أنتي قولتي في الأخر أيه بحس أني نفسيا تعبانه ، يعني مجرد أحساس قيدتي نفسك بيه وعجبك ، كل موقف أو مشكله أنا رايحه للدكتور أنا عايزه الدوا ، أتجوزتي معملتيش حساب لكرامة جوزك وكل ميشوفك زهقانه وتعبانه ، البيت كله بسببك عايش في توتر وقلق وحالة ملل لا تنتهي ، والغريب أنك بتحبيه جدا ومقتنعه بيه وعندك أولاد وحياتك مستقره جدا الحمدلله ، سامحيني كل أللي جوزك قاله كان غصب عنه وفي لحظة غضب لأنه أتحمل كتير كان نفسه يشوف أبتسامه منك يحس أنك راضيه عن حياتك معاه أو كلمة شكر لربنا علي نعمه عليكي قبل ميكون الشكر دا ليه ، لكن أنتي فعلا مفيش فايده وبتقولي مش فاهمه أعمل أيه ، أزاي مش فهمه شابه زيك 29 سنة بتضيع حياتها وبيتها وزوجها بسبب شكاوي وهميه وتذمر وكأنه عرض مستمر ليه أتعاملتي معاه علي أنه حجر مش هيحس ولا هينطق أتقي شر الحليم إذا غضب ، أهو الحجر نطق وساب البيت ولافرق معاه وعايز يطلقك لأنه زوج ورجل ليه كرامه وحقوق وواجبات لاااااااااازم ياخدها زي ما أنتي واخده حقوقك منه كامله ، زيارة الطبيب النفسي مش عيب لكن وقت أذمه حقيقيه مش مع أبسط كلمه تتقالي ، أتمني أنك تفوقي أنتي وزوجات كتير غيرك بتعاملوا مع أزواجهم بنفس طريقتك شكوي وتعب علي مدار الساعه ، وتحاولي تصلحي الأمور بينكم وتنسي الشكوي والمرض والأدويه أللي أكيد هتأثر عليكي علي المدي البعيد وتهتمي بنفسك وبيه وتراعي ربنا فيه وتحترميه كزوج ورجل ، لا يغير الله قوما حتي يغيروا ما بأنفسهم ، أبدأي بنفسك واستعيني بالله وصلي وأتقربي من ربنا عشان نفسك الضعيفه تقوي بالله مش بالشكوي والأدويه وعشان متخسريش النعم أللي معاكي وتندمي وقتها أدوية الدنيا كلها مش هتفيدك ولا هترجع شئ راح ، وأسأل الله لكي الهداية وصلاح الحال النفس والحال.
