ممنوع الاقتراب او التصوير ..
انا زي ما انا مش من كوكب تاني
هو بس حضرتك اللي مش فهماني
مشاعر واحاسيس عليا جديده
ودي بتكون عندك بداية القصيدة
عايز افهم عايز احس
عايز أكون في الصورة وبس
ليه بتسبيني وراء القضبان
ليه ماتحاوليش نواجه سوا الطوفان
اصل الموضوع سهل وبسيط
محتاج منك بس شوية تبسيط
محتاج انك من بدري تجهزي
وتعملي حسابك انك تدرسي
تفهمي طباعي وتحسسي
وتعرفي اني محتاجك توشوشي
بنصايحك وحضنك ليا تلمسي
قلبي قبل عقلي وتضمي وتتريسي
الحكايه اصلها من البدايه
لو فهمتيني تكون احلي نهاية
ممنوع الاقتراب اوالتصوير !!!
جمله بنشوفها علي جدران المنشأت الهامة والغير مسموح بأي معلومات عنها .. كده طبيعي وتمام
اللي مش طبيعي بقي اني الاقيها موجودة جوه بيوتنا في اسر عندها أولاد في سن المراهقه !
وده لمسته بنفسي في اسر كثيره للأسف كانت بتحضر معايا …
بمعني ايه بقي ؟
حضرتك تلاقي الأم بتلاحظ بنتها او ابنها علامات البلوغ تظهر عليهم تبدأ جلسات الصراع وصدور الاحكام بدون أي نقاش أو تفاهم .. وفرض العقوبات والتحذيرات والعمل بقانون فرض حذر التجوال جو البيت وبره !! مش عارفه ازاي بس بيحصل
ومع أول سؤال هو ليه بيحصل ده ؟ تلاقي ردود غريبه !
آآآه ما انت عايز تعمل علينا راجل … آآآه ما انتي فاكرة نفسك كبرتي ( وعجبي )
طيب ياناس أنا عايزة اجابه محدده وما طلبتش منكم أي مسمي وظيفي ليا في البيت (رأي المراهق )
وتحس بقي انهم بيهربوا من الحقيقه وتخوف من الاجابه علي سؤال ممكن يتسأل !
بتكونوا مكشوفين اووي .. وبصراحه كده شكلكم وحش
يعني حضرتك جايه دلوقتي تقولي الكلام ده ليه ؟
سؤال وجيه
انا جايه افهمكم يعني ايه مراهق .. ويعني ايه فترة مراهقه ونعمل ايه ونتصرف ازاي في الفترة الجميله دي ….
جميله اللي هو ازاي يعني ؟!
آه طبعا جميله وفتره مهمه وقوية في حياة أي شخص وهي تقريبا مرحلة المنتصف اللي لا ينفع ترجع فيها للخلف واللي لازم تستغلها علشان اللي بعدها يكون افضل .
طيب ازاااي ؟!
أيوه قلتولي ازاي !!!
بصراحه كده ومن غير مجاملات إحنا اللي غلط مش ولادنا .. لأننا بنبدأ متأخر اوووي بنبدأ نفهم متأخر او انسأل متأخر بعد ما يكون العرض ظهر وإبني او بنتي حابيبي خلاص بعدوا عنا او اخذوا احتياجتهم ومعلوماتهم من مصادر بره ..
الفكره كلها ان علشان اعدي المرحله دي بآمان بخطط ليها كويس اوي من الأول من بداية الطفوله بجهز ازاي هاعدي بأولادي لبر الأمان … وده بيبدأ من أول يوم لطفلي وهو معايا بنقرب من بعض . بنحترم بعض بفهم طباعه وسلوكياته وردود افعاله .
بعرف ازاي احتويه . لازم أكون رباط قوي بينا . بعلمه ازاي يخاف من ربنا مش من بشر .. بتعامل معاه بآدميه عاليه من اهانه وسيطره وبس .
بدرس كل مرحله عمريه وخصائصها واكون جاهزه لاستقبالها زي ( العيد ) كده تمام اكيد اولادي اهم !!!
لازم اشاركه مجتمعه بعرف ميوله ورغباته وآنميها .. اديله مساحه من الحريه والتعبير عن رأيه وبعدين نتناقش هو ليه الرأي ده وايه الصح وايه الغلط وتقنعني ازي او اقنعك ازاي ؟
بتكلم معاهم عن التغيرات اللي بتحصل كل فتره في جسم الانسان .. عن المشاعر السلبيه اللي ممكن يواجهها وازاي يتغلب عليها وكل سن ليه طبعا طريقته واسلوبه .
( مفهوم التربيه الجنسيه ) اللي لازم يتصلح عندنا وأنه ليه معاني كثييير ومختلفه ومهمه واللي ببدأ فيها من عمر يوم .!
بتكلم فيه عن نعم ربنا لينا ووظائف جسمنا والاختلافات اللي ربنا ميز بيها كل انسان والمشاعر والاحاسيس اللي طبيعيه جدا بس ليها وقتها الصح علشان مصلحتك مش علشان لا وبس ..
وببدأ اتدرج في المعرفه وسرد المعلومات حسب كل فتره زمنيه زي ما قلنا .
كل ده حجر أساس للمرحله دي فلو حجر الأساس اتبني صح من الأول مش هنواجه كل المشكلات دي . بالعكس هنلاقي نفسنا بنعديها بسلام مع بعض ومن غير أي مشكلات من اللي بنسمعها واللي للأسف بتوصلنا لكوارث احنا في غنا عنها ..
أخيرا : اتعلموا الأول يعني ايه تربيه .. ادرسوا . اقرؤا ذاكروا وأسألوا واطلبوا المساعده من الناس اللي فاهمه بجد .
مش عيب ولا غلط !
العيب والغلط اني افضل امثل دور الضحيه وفي الحقيقه انا الجاني !
دومتم في نعيم وسلام ورزقكم الله الهدايه وبر اولادكم
بقلم :
نشوي محمد مظهر
اخصائية الإرشاد الأسري والتربوي
